भांगरभूंय | प्रतिनिधी
न्यूयॉर्क, खबरां संस्था: अमेरिकेंत एआय (आर्टिफिशियल इंटेलिजन्स), आयटी मळ, गिरायक सेवा आनी मुळावी बांदावळ वेवस्थापन नेटान वाडत आसा. कोरोनाच्या काळा उपरांत एआयचो विकास दर 60 टक्क्यां परस चड वाडला. गार्टनराच्या अहवाला प्रमाण, फुडल्या वर्सा अमेरिकेंतल्या 90 हजार भारतीय वेवसायिकांची नोकरी धोक्यांत आसा.
फाटल्या तीन वर्सांत सुमार 30 हजार भारतीय वेवसायिकांक एआय खातीर अमेरिकेंत नोकर्यो वगडायल्यात. हे सगळे वेवसायीक एच 1 बी व्हिसाचेर आसात. सध्या अमेरिकेंत सुमार 6 लाख भारतीय वेवसायीक आसात जे एच 1 बी व्हिसा धारक आसात. व्हड कंपनीं एआय मॉडेल नेटान आपणावपाक लागल्यात. ताका लागून एआय खातीर नोकर्यो वचपाचो धोको चड आसा. मॅकेन्झी ग्लोबलाच्या अहवाला प्रमाण अमेरिकेंतल्या ऑटोमेशनाक लागून 2030 मेरेन सुमार 12 लाख लोकांक एक तर नोकरी वगडावची पडटली वा तांकां हेर खंयच्याय मळार नोकरी सोदची पडटली. फॉरेस्टराच्या अहवाला प्रमाण, आयटी मळा वयल्या एआयच्या उदरगतीचो परिणाम सरळ भारतीयांचेर जातलो. सिलिकॉन व्हॅलींतूय तीन वर्सांनी स्टार्टअपांतल्या नोकर्यांचो आंकडो 25 टक्क्यांनी उणो जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
