भांगरभूंय | प्रतिनिधी
संवसारीक टी-20 क्रिकेट सर्तीचे 15वे मॅचींत बांगलादेशान आदलो वस्ताद श्रीलंका पंगडाक 2 विकेटींनी हारयलो. बांगलादेशान खेळाच्या सगल्याच विभागांनी उत्कृश्ट प्रदर्शन केलें.
ग्रॅण्ड पायरी स्टेडियमाचेर जाल्ले मॅचींत श्रीलंकेन पयलीं बॅटींग करतना 9 विकेटी व्हगडावन 124 धांवड्यो केल्यो. ताचो फाटलाव करतना बांगलादेशान 19 ओव्हरींनी 8 विकेटी व्हगडावन 125 धांवड्यो करून जैत जोडलें. संवसारीक टी-20 सर्तीच्या इतिहासांत बांगलादेशान पयलेच खेपे श्रीलंका पंगडाक हारयलो.
ड गटांतले उमळशीक वाडोवपी मॅचींत श्रीलंकेन एका वेळार 4 विकेटी व्हगडावन 100 धांवड्यो करून बरे स्थितींत आशिल्लो. पूण, रिशाद हुसैनान डावाचे 15वे ओव्हरींत सेगीत दोन बॉलांचेर चरिथ असलंका (19) आनी मुखेली वानिंदु हसरंगा (0) हांकां बाद करून श्रीलंकेक खर धपके दिले. ते उपरांत रिशादान आपले फुडले ओव्हरींत धनंजय डिसिल्वाक (21) बाद केलो. हांगाच्यान श्रीलंकेचो डाव गडगडपाक सुरवात जाली. ताच्या निमाण्या पांच बॅट्समनांनी फकत 24 धांवड्यांची भर घाली.
रिशाद हुसैना खेरीत मुस्तफिजूर रहमानान (3-17) सुरवातीक धपके दिल्ल्यान श्रीलंकेक धांवड्यांचो वेग वाडोवपाची संद मेळूंक ना. तस्किन अहमदान दोन विकेटी मेळयली. पथुम निसंका (47) हाणें एक बाजू सांबाळून धरिल्ली. ताणें 28 बॉलांनी सात चवके आनी एक सको मारलो.
मोखीचो फाटलाव करपी बांगलादेशान एका वेळार 28 धांवड्यांचेर 3 विकेटी व्हगडावन संघर्श करतालो. पूण, तौहीद हृदोय (40) आनी लिटन दास (36) हांणी आक्रमक आक्रमक बॅटींग केली. तौहीदान फकत 20 बॉलांनी 200चे स्ट्रायक रेटीन बॅटींग केली. ताका हसरंगान बाद केलो. तौहीदाक साथ दिवपी दास लेगीत हसरंगाच्या बॉलाचेर बाद जालो. हसरंगाची ही 108वी विकेट आशिल्ली. ताणें श्रीलंकेचो आदलो फास्ट बॉलर लसिथ मलिंगाक फाटीं घालो.
डावाचे 18वे ओव्हरींत नुवान तुषारान रिशाद हुसैन आनी तस्किन अहमद हांकां सेगीत दोन बॉलांचेर बाद करून मॅचींत उमळशीक वाडयली. निमाण्या दोन ओव्हरींनी जैता खातीर 12 धांवड्यांची गरज आशिल्ली. महमुदउल्लाह (नाबाद 16) हाणें 19वे ओव्हरींत गरजेच्यो धांवड्यो करून बांगलादेशाक इतिहासीक जैत मेळोवन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
