भांगरभूंय | प्रतिनिधी
रहमानउल्लाह गुरबाज (80) आनी इब्राहीम जदरान (44) हांचे मदीं जाल्ले शेंकड्याचे भागिदारी उपरांत फजलहक फारुकी (4-17) आनी राशीद खान (4-17) हांच्या जबरदस्त बॉलिंगे नेटार अफगाणिस्तानान संवसारीक टी-20 सर्तींतले 14वे मॅचींत न्युझिलॅण्डाक 84 धांवड्यांनी हारयलो.
टॉस हारल्या उपरांत पयलीं बॅटींग करपी करतना अफगाणिस्तानान 6 विकेटी व्हगडावन 159 धांवड्यो केल्यो. ते उपरांत मोखीचो फाटलाव करपी न्युझिलॅण्डाचो डाव 15.2 ओव्हरींनी 75 धांवड्यांचेर सोंपयलो. आंतरराष्ट्रीय टी-20 क्रिकेटींतलें अफगाणिस्तानान न्युझिलॅण्डा आड मेळयिल्लें हें पयलें आनी व्हड जैत थारलें. अफगाणिस्तानान अंदूंचे सर्तींत सेगीत दुसऱ्या जैताची नोंद केली.
ग्लॅन फिलिप (18) आनी मॅट हॅन्री (12) हांकां सोडले जाल्यार न्युझिलॅण्डाच्या एकाय बॅट्समनाक दोट्टी आंकडो हुपपाक जमलो ना.
गुरबाज आनी जदरान हांणी सेगीत दुसरे खेपे शेंकड्याची भागिदारी केली. संवसारीक टी-20 क्रिकेट सर्तींत सेगीत दोन खेपे शेंकड्याची भागिदारी करपी ही तिसरी जोडी थारली. पूण, अशें करपी ती पयली ओपनींग जोडी आसा.
गुरबाज आनी जदरान हांणी पयले विकेटी खातीर 14.3 ओव्हरींनी 103 धांवड्यांची भागिदारी केली. सावकाश सुरवात केल्या उपरांत गुरबाजान गियर बदल्लें आनी 56 बॉलांक तोंड दितना पांच चवके आनी पांच सके मारले. ते उपरांत मात न्युझिलॅण्डाच्या बॉलरांनी पुनरागमन केलें. तांणी थारावीक अंतरान विकेटी घेवन अफगाणिस्ताचो डाव 159 धांवड्यांचेर आडायलो. ट्रॅण्ट बोल्ट आनी मॅट हॅन्री हांणी दरेकी दोन विकेटी घेतल्यो.
मोखीचो फाटलाव करपी न्युझिलॅण्डाची सुरवात बाबत जाली. फारुकीन पयल्याच बॉलाचेर फिन अॅलनाक बोल्ड केलो. ते उपरांत तिसरे आनी पांचवे ओव्हरींत लेगीत एकेक विकेट घेतली. तीन विकेटी फकत 28 धांवड्यांचेर व्हगडायल्या उपरांत न्युझिलॅण्डाच्या बॅट्समनांनी स्वताक सांबाळपाचो यत्न केलो. राशीद खानाच्या मुखार तांचो डाव इस्पिकाच्या बंगल्या भशेन गडगडलो. राशीदान आपली पयली विकेट केन विलियम्सनाच्या रुपान घेतली. ते उपरांत फुडले ओव्हरींत दोन विकेटी घेतल्यो. मोहम्मद नबीन लेगीत दोन विकेटी घेतल्यो.
राशीद आनी फारुकी हांणी दरेकी चार विकेटी घेतल्यो. संवसारीक टी-20 क्रिकेट सर्तींत एकाच डावांत दोन बॉलरांनी चार-चार विकेटी घेवपाची ही तिसरी खेप आसा. दोन खेपे अफगाणिस्तानान हो पराक्रम केला आनी दोनूय खेपे राशीद खानाचो आस्पाव आसा. प्लेयर ऑफ द मॅचीचो पुरस्कार गुरबाजाक फावो जाला. ताणें दुसरे खेपे 75 वा ताचे परस चड धांवड्यो केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
