भांगरभूंय | प्रतिनिधी
फ्रॅंच ओपनाच्या बायलांच्या एकोड्या गटांतले फायनलींत पोलंडाचे इगा स्वियातेकान इटलीचे जॅसमीन पौलिनीक सरळ सेटांनी हारोवन सेगीत तिसरे खेपे वस्तादपण जोडलें, जाल्यार वट्ट चवथे खेपे किताबाचेर नांव कोंत्रायलें.
पौलिनी पयलेच खेपे ग्रॅण्ड स्लॅम सर्तीचे फायनलींत सुवात मेळयिल्ली. पूण, अणभवी स्वियातेका आड तिचें कांयच शाणपण चलूंक ना.
स्वियातेकान पयलो सेट 6-2 असो सहज जिखलो. दुसऱ्या सेटांत पौलिनी कांय प्रमाणांत प्रतिकार करतली अशें दिशिल्लें. पूण, स्वियातेकान दुसरो सेट 6-1 असो जिखून वस्तादपण जोडलें.
संवसारीक क्रमवारींत पयले सुवातेर आशिल्ले स्वियातेकान सेमी फायनलींत अमेरिकन ओपनाची चॅम्पियन कोको गॉफाक हारोवन फायनलींतली सुवात निश्चीत केल्ली. जाल्यार पौलिनीन 17 वर्सां पिरायेचे अॅंद्रिवा हिका 6-3 आनी 6-1 अशा फरकान हारयिल्ली.फ्रॅंच ओपनाचो सेगीत तीन खेपे किताब जिखपी स्वियातेक ही हॅनिना उपरांत पयली खेळगडी थारली. हॅनिनान 2005 ते 2007 अशी तीन खेपे सर्त जिखिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
