भांगरभूंय | प्रतिनिधी
पणजी, बातमीदार ः मान्सूनाच्या पावसान राज्यांत धुमशेण कांडलां. जायत्या सुवातींनी झाडां पडून लुकसाण जावपाच्यो घडणुको घडल्यात. राज्यांत फाटल्या 24 वरांत सरासरी 3.84 इंच पावसाची नोंद जाल्या. हवामान खात्यान आयज आनी फाल्यां राज्यांत घोग्यांनी पावस पडपाची शक्यताय उक्तायल्या. ते प्रमाण ह्या दोन दिसां खातीर रेड अलर्ट जारी केला. जाल्यार 10 आनी 11 जून दिसा उटंगाराच्या पावसाची शक्यताय आशिल्ल्यान ह्या दिसां खातीर ऑरेंज अलर्ट जारी केला.
राज्यांत फाटल्या 24 वरांत काणकोणांत 7.53 इंच इतलो पावस पडलो. साखळें 7.25 इंच, केपें 6.7 इंच, सांग्यार 6.05 इंच आनी मडगांव 5.63 इंच पावसाची नोंद जाल्या. शेनवारा रातीं सावन राजधानी पणजेंत पावस पडपाक सुरवात जाली. नेटाचो पावस नासलो तरी सेगीत पडपी पावसाक लागून शारांतल्या कांय रस्त्यांचेर उदक भरले.
https://www.facebook.com/share/v/cFEt6ffvzr2afmVw/
मजगतीं, व्हड पावस पडपाची शक्यताय आशिल्ल्यान राज्य आपत्ती वेवस्थापन प्राधिकरणान सादूरतायेची शिटकावणी दिल्या. उदकान भरिल्ल्या वा हुंवार येवपाच्या वाठारांनी वचचे न्हय असो उलो प्राधिकरणान मारला. बेगीन शिटकावणी मेळोवपा खातीर सचेत मोबायल अॅप वापरचो वा आपत्कालीन मजती खातीर 0832-2419550, 0832-2225383, 0832-2794100 वा 112 ह्या नंबराचेर संपर्क करचो अशें प्राधिकरणान सांगलां.
मजगतीं, दिवचल आनी सरभोंवतणच्या वाठारांत फाटलें वरभर जालें लायट गेल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
