भांगरभूंय | प्रतिनिधी
नवी दिल्ली, खबरां संस्था ः ईनाडू दिसाळें, ई- टिव्ही आनी रामोजी फिल्म सिटीचे संस्थापक रामोजी राव (88) संवसाराक अंतरले. हैदराबादच्या स्टार हॉस्पिटलांत तांचेर उपचार सुरू आसतना तांका मरण आयलें.
रामोजी राव हांणी रामोजी फिल्म सिटी हो संवसारांतलो सगळ्यांत व्हडलो थीम पार्क आनी फिल्म स्टुडिओ स्थापन केलो. रामोजी राव हांच्या मालकीच्या कंपनींनी मार्गदर्शी चिट फंड, ईनाडू दिसाळें, ईटीव्ही नेटवर्क, रामादेवी पब्लिक स्कूल, प्रिया फूड्स, कालांजली, उषाकिरण मूव्हीज, मयुरी फिल्म डिस्ट्रीब्यूटर्स आनी डॉल्फिन ग्रुप ऑफ हॉटेल्स हांचो आस्पाव आसा.
रामोजी राव हांच्या प्रोडक्शन हाऊसाचें नांव उशाकिरण मूव्हीज आसा. ताणें ‘थोडा तुम बदलो थोडा हम’, ‘प्रतिघात’ अशें जायते ब्लॉकबस्टर फिल्म केले. 2000 वर्सा तांका ‘नूवी कवाली’ ह्या तेलगू चित्रपटा खातीर राष्ट्रीय पुरस्कार फावो जालो. हाचे भायर 2016 वर्सा पद्मभूषण पुरस्कार दिवन तांचो भोवमान केलो.
नरेंद्र मोदी हांणी रामोजी हांच्या मरणाचेर दुख्ख उक्तायला
रामोजी राव हांच्या मरणा उपरांत नरेंद्र मोदी हांणी दुख्ख उक्तायलां. रामोजी राव हांचे कडेन चर्चा करपाची म्हाका संद मेळ्ळी म्हूण हांव स्वताक भाग्यवान मानतां. अशें म्हणून नरेंद्र मोदी हांणी एक्साचेर एक पोस्ट शेअर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
