भांगरभूंय | प्रतिनिधी
मडगांव, प्रतिनिधी ः दक्षीण गोंयांत रेल्वे दुप्पटीकरणाचे काम नेटान चालू आसतना, ज्या वाठारांत काम जालां थंय गतीची चांचणी सुरू आसा. 10 जून दिसा तिनईघांट सावन वास्को ह्या मार्गावयल्या माजोर्डा ते कासावली विभागांतल्या नवीन रेल्वे मार्गाची तपासणी आनी चांचणी जातली. दक्षीण पश्चिम रेल्वे कडल्यान हे संबंदी नोटीस जारी केल्या.
दक्षीण गोंयच्या रेल्वे दुप्पटीकरणाच्या कामाक कांय वाठारांतल्या लोकांचो विरोध चालूच आसा. रेल्वे दुप्पटीकरणाच्या कामाक लागून थळाव्या लोकांचीं परंपारीक घरां, धर्मीक थळां धोक्यांत पडटली आनी हो मार्ग कोळशाच्या येरादारी खातीर करतात असो आरोप आशिल्लो. तिनईघांट ते वास्को रेल्वे दुप्पटीकरणाचे माजोर्डा ते कासावली विभागांतल्या दुसऱ्या रेल्वे मार्गाचें काम पुराय जालां. ह्या नव्या रेल्वेमार्गाची तपासणी आनी गती चांचणी 10 जून दिसा जातली. हे संबंदी दक्षीण पश्चिम रेल्वेच्या दक्षीण विभागाच्या रेल्वे सुरक्षेच्या आयुक्तान नोटीस जारी केल्या. हे नोटीशी वरवीं नागरिकांनी जतनाय घेवची असो उलो मारला. हे चांचणे वेळार कोणेंय रेल्वेमार्ग हुंपपाचो यत्न केल्यार वा कामात आडमेळीं हाडपाचो यत्न केल्यार कायदेशीर कारवाय जातली. रेल्वे ट्रॅक तपासणी आनी गती चांचणे उपरांत बेंगळुरू रेल्वे सुरक्षा आयुक्त हांची मान्यताय मेळ्ळ्या उपरांत हो मार्ग भौशीक येरादारी खातीर उक्तो करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
