भांगरभूंय | प्रतिनिधी
आमकां सरकारांत नोकरी केन्ना मेळटली? आमीय आसात, मंत्री आमचे कडेन पळयनात, सरकारांत नोकरे खातीर मंत्र्यांच्या उतराक मोल आसा, पयशे मागतात हीं उतरां लोकसभा वेंचणुके वेळारय बाजारांत समेस्तांक आयकूंक मेळ्ळीं. दीसपट्टीं तीं आयकल्यार मतांचें वारें बदलचे ना? सद्दां टीव्ही चेर आमी हें केलां, तें केलां अशें मंत्री, मुख्यमंत्री सांगतात. पूण शेजाऱ्या कडेन आसा तसली गाडी आमचे लागीं ना हें तांकां खबर आसा? हें तरणाट्यांचें मन. प्रदेश भाजप फुडारी श्रीपाद नायक हांकां लोकसभा वेंचणुके वेळार तें कळ्ळें. देवळां, तिठ्यार भोंवत, मतदारां कडेन वतना ते आदले मुख्यमंत्री लक्ष्मीकांतबाब पार्सेकार, संघनिती कडेन एकनिश्ठ आशिल्ले सुभाषबाब वेलींगकार हांकांय ते मेळ्ळे. 50 टक्के मतदारां मेरेन वचूंक ते पावले ना तरी ते जिखले. केंद्र सरकार, राज्य सरकार, प्रदेश भाजप अध्यक्ष हांचे परस ते आनी तांची पक्ष निश्ठा व्हड. तांचे पक्ष निश्ठेक सलाम करून उत्तर गोंयच्या विधानसभा मतदारसंघांतले आमदार ते वेंचून येवपा पासत वावुरले. आपल्या मतदारांक नमस्कार करपी तांची जायरात वेंचणुके उपरांत छापून आयली. कितें सांगता ती? मतदारांच्या हांव रिणांत आसा, तुमचे खातीर वावुरप हीच म्हजी लागणूक. प्रचाराचे पयले भोंवडेंत समेस्तांचे प्रस्नार प्रस्न आयकून आपलो मतदारांक वाज आयला तें तांकां कळ्ळें. ही म्हजी निमाणी लोकसभा वेंचणूक अशेंय सांगून ते मेकळे जाले तेन्नाच उत्तेरेचे मतदार तांकां लागीं आयले. मतदारां मुखार बागोवचेंच पडटा, निमाणें मतदार श्रेश्ठ, तीच लोकशाय. ताची जाणविकाय मतदारांनी संसदेर धाडिल्ल्या खासदारांनी दवरपाक जाय. वेंचणुके वेळार प्रस्थापितां आड (सत्तेर आसपी) ल्हार आसता, पांच, धा वर्सां उपरांतय तें येवंक शकता हो रकाद मतदारांनी खासदारांक धाडला. नवे, बळिश्ट, अणभवी लोकप्रतिनिधी लोकसभेर वेंचून आयल्यात, बदलपी वाऱ्या पावसा बरोबर धांवपाचे प्रतिनिधी तांणी जावचे.
गोंयांत भाजपा सरकार खंय कमी पडटा? तें श्रीपादभाऊ, दक्षीणेंतल्यान वेंचणूक जिखिल्ले काँग्रेस पक्षाचे विरियातो फर्नांडीस, वेंचणुकेंत हारिल्ल्यो पल्लवी धेंपो, आदले केंद्रीय मंत्री रमाकांत खलप राजकी पक्षा बरोबर राज्य सरकारा मेरेन पावयतले अशी आस्त आसा. एक पत्र मुख्यमंत्र्यांक तांणी धाडचेंच. मनोज परब हांची क्रांती सेना फुडारांत प्रादेशीक पक्ष म्हणून भाजपा, काँग्रेसी आड झुजपाक तयार जाता हें 2024 चे लोकसभा वेंचणुकेंतल्या मतदानांतल्यान दिश्टी पडटा. धर्मा इतलेंच जातीच्या राजकारणाचें वारेंय देशा वांगडा गोंयच्या समाजांत (पिडेस्त) आयजय आसा. गावडा, कुणबी, वेळीप समाज दुखावला, तांचें अचूक दुखणें समजून घेवंक सरकार कमी पडटा हें मतदारांनी दाखोवन दिलां. मुख्यमंत्र्यांनी ते विशीं पक्षाची केंद्रीय समिती, वरिश्ठ मंत्र्यां कडेन उलोवन बेगोबेग मंत्रीमंडळांत बदल करचे.
2022 वर्सा जाल्ले गोंय विधानसभा वेंचणुके वरी 2027 ची विधानसभा वेंचणूक आसची ना हें लोकसभा वेंचणुकेंतल्यान कळ्ळां. अस्तुरी राखीवतेंतल्यान अस्तुरेक 33 टक्के उमेदवारी दिवचीच पडटली. प्रशासनांत सुदारप करतना सरकारान मंत्रीमंडळात बदल करप गरजेचें. गोंयांत फाटलीं दोन वर्सां जाल्ले अॅक्सिडेंट (चड दक्षीण गोंयच्या तालुक्यांनी) लोक विसरूंक ना. अॅक्सिडेंट कित्याक जातात? ताचें मूळ पुलिशेंतल्या येरादारी विभागान सोदून काडलें, उपाय करपाच्यो सुचोवण्यो केल्यो. पूण येरादारी खात्याचें प्रशासन मोडिल्ल्यान त्यो चालीक लागल्यो ना? मंत्री जीएसटी, पंचायतींत अती लक्ष घालपी, मागीर मतांची व्हड अपेक्षा दवरप कशी? अॅक्सिडेंट आडावपा पासत केंद्रीय येरादारी कायद्यांत व्हड बदल जावचे म्हणून खासदार सदानंद शेट तानावडे हांकां सुचोवण्यो करच्यो पडटल्यो.
उदरगत जाली, पयसो सरकाराकय मेळ्ळो, उदरगतींतल्यान रोजगाराची संद मेळ्ळी पूण तरी खासगी नोकरेंत आशिल्ले सरकारी नोकरेची आस्त बाळगुपीय आसात. वर्सांची वर्सां केंद्रीय फॅक्टरी कायद्यांत बदल जाल्ले ना. गोंया भायल्या गोंयकारांक आडावपा पासत गोंयच्या आमदार, मंत्र्यांनी कामगार कायदो सुदारलो म्हणून कायदो चालीक लागचो ना हें सत.
अखील भारतीय काँग्रेसीच्या राष्ट्रीय अध्यक्षपदार उसरां आयिल्ले खासदार मल्लिकार्जून खर्गे हे कामगारांचे फुडारी आशिल्ले. ते पयलींचे कामगार मंत्री आशिल्ल्यान तांच्या फुडारपणा खाला काँग्रेसीच्या खासदारांची संख्या वाडल्या. बेकींतल्यान एकी हाडपाचो लाव काँग्रेसीक, तृणमूल काँग्रेस, समाजवादी पार्टी, राष्ट्रवादी काँग्रेसीक (शरद पवार) जाला. दोन मतदारसंघातल्यान जैत जोडपी राहूल गांधी हांकां लोकसभेचें विरोधी पक्ष मुखेलीपद दिवपाची मागणी काँग्रेस कार्यकर्ते, समित्यां कडल्यान जाता. भारतभर भोंवतना नेहरू जाकिटा परस टी शर्ट, सादो शर्ट घाल्यार, मतां मेळूंक शकतात हें तांकां होलमलें. निमाणें तेंपा प्रमाण कुरपणे घालपाक जाय, आयटी आनी एआय चे परिणाम – वायट, बरे ते समेस्तांक सांगपाक जाय, एकी हेंच बळगें हाची जाणविकाय तांकां जाल्या. ते जाणविकायेंतल्यान लोकसभेच्या वावरांत घुस्पून घेवपाची तांक तांकां आयल्या.
गावडा, कुणबी, वेळीप, धनगर समाज म्हळ्यार गोंयचे मूळ भुंयपूत. त्या समाजाचीं गणितां दक्षीण गोंयांत प्रदेश भाजपान समजून मिशन सालसेत करपाक उत्तरेंतल्या मंत्र्यांक धाडिल्ले जाल्यार दक्षीण लोकसभा मतदारसंघ भाजपाक मेळपाचो.
पक्षांतराचें राजकारण फाटल्या पांच वर्सांत व्हड जायत गेलां, गोंयांतल्यान महाराष्ट्रा मेरेन तें पाविल्ल्यान महाराष्ट्र भाजपाकय लोकसभा वेंचणुकेंत लुकसाण जालां.
वेंचणुकेच्या नव्या पर्वांत एक गांधी लोकसभेंत, एक गांधी राज्यसभेंतय आसा, पूत आनी आवय. एक गांधी आवय आनी पुताक घरा बसोवपा फाटल्यान राजकारण आसा?
2024 चे लोकसभा वेंचणुकेंत कांय नवे प्रयोग भाजपान प्रदेश, केंद्रीय पांवड्यार केले. वेंचणुकेच्या नव्या पर्वा कडेन व्हरपी कोण जिखूंक शकता, कोणाक धपको बसूंक शकता हाची जाणविकाय मुख्यमंत्री डाॅ. प्रमोद सावंत हांकां नाशिल्ली? तांकांय थाकाय आयल्या? समाज मनाची वळख तांकां ना? सरकार आनी पक्ष हांकां जोडपी पक्षाची यंत्रणा कोसमेल्या? खासदार तानावडे हांकांच न्हय तर श्रीपादभाऊ, आमदार दिगंबर कामत हांकां विश्वासांत घेवन पक्षा आड वावुरपी मंत्रीमंडळांतले कांटे तांणी बेगीन काडचे. उत्पल पर्रीकार हांकां भाजपांत घेवंक नाशिल्ल्याचे परिणाम दक्षीणेच्या मतांचेर जाले. उत्पल हांचें एक उतर आयजय राष्ट्रीय पांवड्या वेली खबर जाता. तांकांय ते खंय चुकतात तें सांगून पक्षाचे नवे बांदावळींत घेतल्यार 2027 चे विधानसभा वेंचणुकेंत 25 आमदारां मेरेन पावप प्रदेश भाजपाक शक्य आसा. कांय म्हामंडळा, मंडळां, सरकारी यंत्रणां मुख्यमंत्र्यांनी नदर घालपाची वाट पळयतात. पक्षनिश्ठ, वेवसायिकां कडेन त्यो कित्याक दिवच्यो न्हय?
स्मार्ट सिटी विशीं बोवाळ जालो तरी पणजी, ताळगांवचे चडशे मतदार भाजपा वाटेन रावले. उत्पलान जोडून दवरिल्ल्या मतदारांचोय वांटो तातूंत आसा. मडगांव फुट्टा? पणजे परस लोकसंख्या चड आसूनय मडगांव म्हापालिका कित्याक जायना? नवो जिल्हो पंचायत मतदारंघ साश्टींत जातलो? वर्सा भितर जापो मेळटल्यो.
हो पडलो, तो गेलो, ती आयली, ती पडली हें चित्र खिणा भितर तुमचे आमचे मुखार दवरपी, मोडपी यंत्रणा लोकसभा वेंचणुके वेळार धांवली. शिता फुडें मीठ खावपी हजारांनी आसले पूण सत, अचूक म्हायती लोकांक मेळ्ळीच ना.
सरकाराक सरकारांतल्या वांगड्यांनी खेपपाचो वावर नाका तेन्ना केलो. भाऊंकय ताचो धपको बसपाचो. पूण ते अणभवी. अणभवान पुताक सिद्धेशाक तांणी भोंवडायलो, बराबरीन आनी हेरा वांगडाय, भाजपाक जैत हाडपाक.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
