भांगरभूंय | प्रतिनिधी
संजय हळदणकारः वाळपय सम्राट क्लबान मनयलो पर्यावरण दीस
भांगरभूंय । प्रतिनिधी
वाळपयः पर्यावरणाची राखण आमी ल्हान ल्हान गजालींतल्यान करपाक शकतात. ताची सुरवात आमच्या घरांतल्यानूच सुरू जाता. ते खातीर दरेकल्यान पर्यावरणाचो सांबाळ करपाक आपल्या घरांतल्यानूच सुरवात करप गरजेचें आसा. भुरग्यांक चित्रकला सर्तीच्या माध्यमांतल्यान पर्यावरणाची राखण कशी करपाक जाता, हे संबंदांतली आवड निर्माण करचे खातीर चित्रकला सर्त हो बरो पर्याय आसा, अशें वाळपय सम्राट क्लबाचे संयोजक संजय हळदणकार हांणी सांगलें.
वाळपय सरकारी मुळावें विद्यालयान वाळपय शारांत संवसारीक पर्यावरण दिसा निमतान वाळपय सम्राट क्लबा वतीन चित्रकला सर्त घेतिल्ली. हे सर्तांत वट्ट 38 भुरग्यांनी वांटो घेतिल्लो. ह्या वेळार आयोजीत केल्ले कार्यावळींत हळदणकार उलयताले. तांचे वांगडा विद्यालयाचे शिक्षक दत्ताराम मयेंकार, चतुरा गांवकार, दीपा सांडे, स्मृती शिरोडकार, विठू गावडे, मीरा गांवस आनी हेर मानेस्त हाजीर आशिल्ले.
आमच्या पर्यावरण संपत्तीचें राखण करप गरजेचें आसा. न्हंयांनी जावपी प्रदुशण आडावप खूब गरजेचें. तशेंच आमचे भोंवतणी आशिल्लीं झाडांचो सांबाळ करात, तांचें संवर्धन करात. सैमांत आशिल्ल्या प्राणवायूची निर्मिती प्रदुशणा बगर जातली हाचेर विशेश लक्ष दियात. हवामानांत आशिल्लें कार्बनडायऑक्सायड उणें करपाक मजत करात, अशी विनवणी हळदणकार हांणी केली. पर्यावरणाची राखण आमी कशे तरेन करपाक शकतात, हे संबंदांतली खोलायेन तांणी म्हायती दिली.
दत्ताराम मयेंकार हांणी सांगलें, वाळपय सम्राट क्लबा वतीन अशे तरेची समाजीक कार्यावळ आयोजीत करून भुरग्यांक तातूंत वांटेकार करून घेवपाचो हो यत्न खऱ्यांनीच तोखणायेचो आसा. भुरग्यांच्या मनांत पर्यावरणा विशींची जागृताय निर्माण करप गरजेचें आसा. अश्या ल्हान उपक्रमा वरवीं आमी तें सहजतायेन करपाक शकतात. सम्राट क्लबान समाजाचे उदरगतींत म्हत्वाचें योगदान दिलां, अशेंय तांणी सांगलें. ‘पर्यावरण वाटायात’ ह्या विशयाचेर भुरग्यां खातीर चित्रकला सर्त आयोजीत केल्ली. विद्यालयाचे शिक्षक दत्ताराम मयेंकार हांणी प्रास्तावीक केलें जाल्यार विठू गावडे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
