भांगरभूंय | प्रतिनिधी
म्हापशें: म्हापशेंच्या जानकी लॉजच्या मुखार आशिल्ले कोसकार अॅण्ड केसरकार इमारतीचो कॉंक्रिटाचो स्लॅब कोसळून चार गाडयांचें लुकसाण जालें. जाल्यार एका दुकानदार बारीक दुखापत जाली. मात, कोणाक कांय जावंक ना. ही चाळीस वर्सां आदली इमारत आसा.
ही घडणूक शुक्रारा सकाळीं सुमार 11.30 वरांचेर घडली. कोसकार अॅण्ड केसरकार इमारतीच्या तळ माळ्या वयलें पांखें मोडूंक पाविल्ल्यान कॉंक्रिटाचो स्लॅब कोसळ्ळो. हे इमारती कुशीक गाडयो आनी मोटार सायकली पार्क केल्ल्यो.. तातूंत जीए 03 व्हाय 5623 ही रावजी धारगळकार हांची आय ट्वेन्टी आनी जीए 03 झॅड 3049 ही डोरोथी परेरा हांची वेगन आर मोटार तशेंच जीए 04 के 7576 आनी जीए 03 एयू 4392 ह्या दुचाकींचो आस्पाव आसा. कॉंक्रिटाचो स्लॅब कोसळिल्ल्यान चारूय वाहनांचें व्हड प्रमाणांत लुकसाण जालें.
हे घडणुके वेळार रावजी धारगळकार हे आपल्या दुकानांत आशिल्ले. स्लॅब कोसळिल्ल्याचो आवाज आयिल्ल्यान ते दुकानांतल्यान भायर सरले तेन्ना तांच्या हाताचेर स्लॅबाचे कांय कुडके पडले आनी ताच्या हाताक दुखापत जाली. हे इमारतीच्या फुटपाथार दोग जाण न्हिदिल्ले. मात हे घडणुके पयलींच ते थंयच्यान गेल्ल्यान कोणाक कांय जावंक ना.
हे घडणुकेची म्हायती मेळटाच म्हापशें उजो पालोवपी दळाचे अधिकारी अशोक परब हांच्या फुडारपणा खाला जवानांनी घडणुके सुवातेर येवन धोको निर्माण करपी स्लॅब कटराचेर मजतीन कापून उडयलो. म्हापशें पुलीस निरिक्षक निखील पालेकार, उपनिरिक्षक आदित्य गाड, हवालदार केशव नायक, आल्विटो डिमेलो हांणी घडणुकेचो पंचनामो केला.
मजगतीं, 2014 त काणकोणां इमारत कोसळिल्ल्याची घडणूक घडिल्ली. हे घडणुकेचे फाटभुंयेर त्याच वर्सा म्हापशें पालिकेन पालिका वाठारांतल्यो मोडपाक पाविल्ल्या इमारतींचो सर्वे केल्लो. तशेंच इमारत धनयां आड पालिका कायद्याच्या कलम 190 प्रमाण कारवाय करपाचो निर्णय घेतिल्लो. ते प्रमाण शारांतल्या सुमार 12 इमारतींक नोटीस धाडून इमारती रिती करपाचो आदेश इमारत धनयांक आनी भाडेकारांक दिल्लो. मात, ह्या लोकांनी अजूनय ह्यो इमारती रित्यो करूंक नात. कसलीय घडणूक घडल्यार पालिका तात्पुरती दखल घेता. मात फाटलीं 10 वर्सां धोको निर्माण करपी सांगिल्ल्या इमारतीं मदले एकेय इमारतीक हात लावपाक पालिकेक येस येवंक ना.
मजगतीं, कोसकार अॅण्ड केसरकार इमारतीचे धनी पुरूषोत्तम कोसकार हांणी जानेवारी 2018 त म्हापशें पालिकेक पत्र धाडून इमारत मोडपाक पाविल्ल्याची म्हायती दिल्ली. तशेंच हे इमारतीची पळोवणी करची, अशी मागणी पत्रांतल्यान तांणी केल्ली. मात फाटलीं 6 वर्सां पालिकेन ह्या पत्राची दखल घेवंक ना.
हे आदीं शारांतल्या धोकादायक इमारतींक पालिकेन नोटिसो धाडल्यात. हे इमारतींची घटसाण आनी ह्या अहवालाचें ऑडीट करप गरजेचें आसा. पोरण्या इमारतींचें सर्वेक्षण करून कारवाय करचे खातीर पालिकेच्या तांत्रीक विभागाक धाडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
