भांगरभूंय | प्रतिनिधी
म्हापशें: म्हापशेंचें जागृत देवस्थान श्रीदेव बोडगेश्वर देवळांत जाल्ले चोरयेंतले पुलिसांनी जप्त केल्ले 5.83 लाख रुपया देवस्थानाक न्यायालया वतीन परतून मेळ्ळे. जाल्यार दुबावीत राजू फरात शेख हाणें बांगलादेशांत आपल्या घरच्यांक धाडिल्ले 1.33 लाख रुपया परतून मेळोवचे खातीर म्हापशें पुलिसांनी प्रक्रिया सुरू केल्या.
हे चोरयेंतले दुबावीत राजू फरत शेख (27. रा. कोलकाता, पश्चीम बंगाल आनी मूळ बांगलादेश), इम्रान शहीद शेख (24, रा. नालासोपोरा- गुजरात), राखीब कुलमोहम्मद शेख (28, रा. सुरत – गुजरात) आनी मुजाहीद गुलजार खान (28, रा. कोरेगाव- पुणे आनी मूळ झारखंड) हांकां खोपोली महाराष्ट्र पोलिसांनी अटक केल्ली. पुलिसांनी दुबावितां कडल्यान 7.20 लाख रुपया जप्त केल्ले. तातूंत राजू शेख हाणें बांगलादेशांत धाडिल्ल्या आनी बँक खातें सील केल्ल्या 1.33 लाख रुपयांचो आस्पाव आशिल्लो. 7.20 लाखांतले 7.16 लाख रुपया बोडगेश्वर देवळांत केल्ले चोरयेंतले आशिल्ले.
वयल्या दुबावितांक खोपोली पुलिसांनी 12 मेक हस्तांतरीत पद्दतीन ताब्यांत गेवन अटक केल्ली. बोडगेश्वर देवळांतले चोरयेचो तपास पुराय केले उपरांत म्हापशें पुलिसांनी 24 मेक दुबावितांक खोपोली पुलिशेचे सुवादीन केले, तशेंच न्यायालयीन प्रक्रिया करून जप्त केल्ली रकम पुलिसांनी ताब्यांत घेतली.
बोडगेश्वर देवस्थानाचे कार्यकारी समितीन ही रकम परतून मेळोवचे खातीर न्यायालयांत अर्ज केल्लो. न्यायालयान मान्यताय दिले उपरांत म्हापशें पुलिसांनी बिरेस्तारा 6 जूनाक 5 लाख 83 हजार रुपया समितीच्या ताब्यांत दिले.
मजगतीं, 29 एप्रीलाक मध्यानरातीर 2.05 ते 2.38 वरां मदीं ही चोरी जाल्ली. दुबावीत चोरांनी देवळाचो सुरक्षारक्षक दशरथ ठाकूर (61) हाका बांदून घालून फंडपेटयो फोडल्यो आनी तीन सांक भरून पयशे चोरून व्हेल्ले. म्हापशें पुलिसांनी दिल्ले म्हायती वयल्यान 30 एप्रीलाक खोपोली पुलिसांनी सावंतवाडी- कोल्हापूर मदल्या वाठारांत दुबावितांक धरून हे चोरयेचो तपास लायिल्लो.
दुबावितांनी गुगला वयल्यान गोंयांतल्या गिरेस्त देवळांतलें एक बोडगेश्वर देवस्थानाची म्हायती मेळयली आनी उपरांत रेकी करून ही चोरी केल्ली.
गोंय आनी खोपोली पुलिसांचे उपकारीः समिती
देवळांत जाल्ले चोरयेंतले पुलिसांनी जप्त केल्ले 5.83 लाख रुपया रकम आमी न्यायालया वतीन मेळयल्या. एका दुबावितान हे चोयरेंतली रकम हस्तांतरीत केल्लें बँक खातें पुलिसांनी सील केलां. ही रकम लेगीत सगळे प्रक्रिये उपरांत देवस्थानाक मेळटले. हे चोरयेचो तपास करचे खातीर कश्ट घेतिल्ले म्हापशेंचे पुलीस उपअधिक्षक संदेश चोडणकार, निरिक्षक निखील पालेकार आनी देऊलकार, तांचे सांगाती, तशेंच गोंय आनी खोपोली पुलिसांचें देवस्थान समिती उपकारी आसा, अशें बोडगेश्वर देवस्थान कार्यकारी समितीचे अध्यक्ष आनंद भाईडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
