भांगरभूंय | प्रतिनिधी
म्हापशें, प्रतिनिधी ः म्हापशेंच्या जानकी लॉजच्या मुखारचे कोसकर अॅण्ड केसरकर इमारतीचो कॉंक्रिटाचो स्लॅब कोसळून चार गाडयांचे लुकसाण जालें. जाल्यार एका दुकानदार बारीक दुखापत जाली. मात, कोणाक कांय जावंक ना. ही चाळीस वर्सां आदली इमारत.
ही घडणूक शुक्रारा सकाळीं सुमार ११.३० वरांचेर घडली. कोसकर ऍण्ड केसरकर इमारतीच्या तळ माळयेवेलें पांखें मोडूंक पाविल्ल्यान कॉंक्रिटाचो स्लॅब कोसळ्ळो. हे इमारती कुशीक गाडयो आनी मोटार सायकली पार्क केल्ल्यो आसल्यो. तांतल्या जीए ०३ व्हाय ५६२३ ही रावजी धारगळकार हांची आय ट्वेन्टी आनी जीए ०३ झेड ३०४९ ही डोरोथी परेरा हांची वेगन आर कार तशेंच जीए ०४ के ७५७६ आनी जीए ०३ एयू ४३९२ हांचो आसपाव आसा. कॉंक्रिटाचो स्लॅब कोसळिल्ल्यान चारूय वाहनांचें व्हडा प्रमाणांत लुकसाण जालें.
हे घडणुके वेळार रावजी धारगळकार हे आपल्या दुकानांत आशिल्ले. स्लॅब कोसळिल्ल्याचो आवाज आयिल्ल्यान ते दुकानांतल्यान भायर सरले तेन्ना तांच्या हाताचेर स्लॅबाचे कांय कुडके पडले आनी ताच्या हाताक दुखापत जाली. हे इमारतीच्या फुटपाथार दोग जाण न्हिदिल्ले. मात हे घडणुके पयलींच ते थंयच्यान गेल्ल्यान कोणाक कांय जावंक ना.
हे घडणुकेची म्हायती मेळटांच म्हापशें उजो पालोवपी दळाचे अधिकारी अशोक परब हांच्या नेतृत्वा खाला जवानांनी घडणुके सुवातेर येवन धोको निर्माण करपी स्लॅब कटराचेर मजतीन कापून उडयलो. ग्हापशें पुलीस निरीक्षक निखिल पालेकार, उपनिरीक्षक आदित्य गाड, हवालदार केशव नायक, आल्विटो डिमेलो हांणी घडणुकेचो पंचनामो केला.
मजगतीं, २०१४त काणकोणा इमारत कोसळिल्ल्याची घडणूक घडिल्ली. हे घडणुकेचे फाटभूंयेर त्याच वर्सा म्हापशें पालिकेन पालिका वाठारांतल्यो मोडपाक पाविल्ल्या इमारतींचो सर्वे केल्लो. तशेंच इमारत धनयां आड पालिका कायद्याच्या कलम १९० प्रमाण कारवाय करपाचो निर्णय घेतिल्लो. ते प्रमाण शारांतल्या सुमार १२ इमारतींक नोटीस धाडून इमारती खाली करपाचो आदेश इमारत धनयांक आनी भाडेकारांक दिल्ली. मात, ह्या लोकांनी आजूनय ह्यो इमारती खाली करूंक ना. कसलीय घडणूक घडल्यार पालिका तात्पुरती दखल घेता. मात फाटलीं धा वर्सां धोको निर्माण करपी सांगिल्ल्या इमारतीं मदले एकेय इमारतीक हात लावपाक पालिकेक येस येवंक ना.
मजगतीं, कोसकर ऍण्ड केसरकर इमारतीचे धनी पुरूषोत्तम कोसकार हांणी फाटल्या जानेवारी २०१८ त म्हापशें पालिकेक पत्र धाडून इमारत मोडपाक पाविल्ल्याची म्हायती दिल्ली. तशेंच हे इमारतीची पळोवणी करची अशी मागणी पत्रांतल्यान तांणी केल्ली. मात फाटलीं स वर्सां पालिकेन ह्या पत्राची दखल घेवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
