भांगरभूंय | प्रतिनिधी
नवी दिल्ली, खबरां संस्था: अठरावे लोकसभा वेंचणुकेचो निकाल ४ जून दिसा जाहीर जाला. नव्यान वेंचून आयिल्ल्या ५४३ खासदारांतले ४६% म्हळ्यार २५१ लोकांचेर गुन्यांवकारी आरोप आसात. तातूंतल्या २७ खासदारांक वेगवेगळ्या न्यायालयांनी दोशी थारायल्यात.
असोसिएशन ऑफ डेमोक्रेटिक रिफॉर्म्सच्या (एडीआर) अहवाला प्रमाण, हो आयज मेरेनचो सगळ्यांत चड गुन्यांवकारी खासदारांचो आंकडो जावन आसा. आदीं २०१९ त फौजदारी खटले आशिल्ले २३३ (४३%) खासदार लोकसभेंत पाविल्ले.
१७० खासदारांचेर बलात्कार, खून, खून करपाचो यत्न, अपहरण आनी बायलां आड गुन्यांव दाखल केल्यात. भाजपाचे ६३ खासदार, कॉंग्रेसीचे ३२ खासदार आनी सपाचे १७ खासदारांचेर गंभीर गुन्यांव नोंद केल्यात. हे वळेरेंत तृणमूल कॉंग्रेसीचे ७, डीएमकेचे ६, तेलुगू देशम पार्टीचे ५ आनी शिवसेनेचे ४ खासदार आसात.
तीन खासदार, जांचेर सगळ्यांत चड खटले आसात
सगळ्यांत गुन्यांवकारी खासदारां मदीं केरळाच्या इडुक्की मतदारसंघांतले कॉंग्रेसचे डीन कुरियाकोसे हांचें नांव मुखार आसा. डीन १.३३ लाख मतांनी जैतिवंत जाल्यात. तांचे आड सुमार ८८ केशी नोंद जाल्यात. हे वळेरेंतलें दुसरें नांव कॉंग्रेसीचेच शफी पारंबील आसात. तांचेर ४७ प्रकरणां नोंद आसात आनी तिसरें नांव भाजपाचे इटेला राजेंद्र आनी तांचे आड ४३ प्रकरणां दाखल जाल्यांत.
बायलां आड जावपी गुन्यांवांत १५ खासदार
१५ खासदारां आड बायलांवेले गुन्यांव दाखल जाल्यात. तातूंतल्या २ जाणांचेर आयपीसी कलम ३७६ खाला बलात्काराचे आरोप आसात. हाचे भायर ४ खासदारांचेर अपहरणाच्यो केशी नोंद जाल्यात. ४३ जाणांनी वेंचणुकेच्या प्रतिज्ञापत्रांत दुस्वासी भाशण केल्ले संबंदी प्रकरणांचो उल्लेख केल्लो.
खासदारांची वळेरी राष्ट्रपती कडेन दिली
वेंचणूक प्रक्रिया पुराय जाले उपरांत आयतारा सांजवेळार मुखेल वेंचणूक आयुक्त राजीव कुमार आनी वेंचणूक आयुक्त ज्ञानेश कुमार आनी सुखबीर सिंग संधू हांणी लोकसभा वेंचणुकेंत जिखपी उमेदवारांची वळेरी राष्ट्रपती द्रौपदी मुर्मूक भेटयली. ही वळेरी राष्ट्रपती कडेन सादर केल्या उपरांत १८ वी लोकसभा घडोवपाची औपचारीक प्रक्रिया सुरू जातली.
हाचे पयलीं बुधवारा राष्ट्रपती हांणी सतरावी लोकसभा विसर्जीत करपाचो आदेश दिल्लो. नरेंद्र मोदी सेगीत तिसरे खेपे केंद्रांत सरकार घडोवपाची तयारी करतात. एनडीएक २९३ जागे, जाल्यार विरोधी इंडिया ब्लॉकाक २३४ जागे मेळ्ळ्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
