फिल्मी खबरो

भांगरभूंय | प्रतिनिधी

‘मिस्टर अँड मिसेस माही’क ‘श्रीकांत’ची बाधा

राजकुमार राव आनी जान्हवी कपूर अभिनीत ‘मिस्टर अँड मिसेस माही’ फिल्माची येणावळ अॅव्हरेज कॅटेगरींत जाता. 40 कोटी रुपयान तयार जाल्ल्या ह्या फिल्मान पयल्या सप्तकांत 25 कोटींचो वेवसाय केला. मिस्टर अँड मिसेस माहीक राजकुमार राव हाचोच ‘श्रीकांत’ फिल्म बादपाक लागला. दोनूय फिल्मां थेटरांनी चलतात. श्रीकांत फिल्माची येणावळ 50 कोटी रुपयांक तेंकल्या. एकाच मुखेल अभिनेत्याची फिल्मा फाटोफाट प्रदर्शीत जावपाची ही हालीं तेपावेली दुर्मीळ गजाल. 90च्या दसका पयलीं तशें जातालें.

सस्पॅन्स थ्रीलर ‘सावी’ फ्लॉप

अनील कपूर, दिव्या खोसला, हर्षवर्धन राणे अभिनीत सस्पॅन्स थ्रीलर ‘सावी’ फिल्म फ्लॉप थारलो. फाटल्या सप्तकांत प्रदर्शीत जाल्ल्या ह्या फिल्मान आतांमेरेन फकत 9.5 कोटी वेवसाय केला. ह्या फिल्माक मेळटा तो प्रतिसाद पळयत जाल्यार दुसऱ्या सप्तकांत चडांत चड 14-15 कोटींमेरेन वचपाक शकता. 20 कोटी रुपयांत जाल्ल्या ह्या फिल्मांत सगळ्या कलाकारांनी बरो अभिनय केला. फिल्माक रेटिंगूय बरें मेळ्ळा, तरीकूय थेटरांनी प्रेक्षकांचो जाय तसो प्रतिसाद मेळूंकना.

विजयाचेर शाहरुख इफॅक्ट?

तामीळ फिल्म इंडस्ट्रीतलो हिरो विजय सेथुपती शाहरुख खानाच्या कामाचे पद्दतीचेर खुपूच प्रभावीत जालां. पोरूं ‘जवान’ फिल्मांत विजय व्हिलन जाल्लो. ह्या फिल्मांत काम करतना खूप कितें शिकपाक मेळ्ळें म्हूण विजयान तामीळ फिल्म ‘महाराजा’च्या प्रोमोशनावेळार सांगलें.
जवान फिल्मांत काम करतना शाहरुख खान खंय दुयेंत पडिल्लो. मात, तो दुयेंत आसा म्हूण ताणें स्वता सांगासर कोणाकूच खबर कळूंक ना. शाहरुख काम करतना सुरवाते सावन निमाणेमेरेन उत्साही आसता. ताचो उत्साह दिसभर काम केल्यार लेगीत मात्तूय उणो जायना. कलाकारान काम करतना खंयच उणें पडूंक जायना म्हूण एनेर्जेटिक आसपाक जाय, हें खंय शाहरुखा बरोबर काम करतना कळ्ळें. विजयाक खंय आतां रोमँटिक फिल्म करपाचे आसा. हो शाहरुख इफॅक्ट म्हणपाचो काय आनी कितें?

‘मंजुमल बॉयज’ @ 242 कोटी

मल्याळम फिल्म मंजुमल बॉयजान विक्रम 242 कोटी रुपया जोडले. फकत 20 कोटी रुपयान तयार जाल्ल्या ह्या फिल्मान धमाकेदार कामगिरी करतना बीग बजेट फिल्मांक फाटी उडयले. 2006तल्या एका खऱ्या घटनेचेर आधारीत आशिल्ल्या ह्या फिल्मान मल्याळम फिल्म इंडस्ट्रीतल्या फिल्मांचे बाबतींत विक्रम रचतना 200 कोटी रुपया जोडपी पयलीं फिल्म जावपाचो मान मेळयल्लो. आतां हें फिल्म अडेजशे कोटींचो पांवडो हुंपून नवो विक्रम रचपाचे तयारेंत आसा.

‘हम दो हमारे बारा’ फुडें धुकल्लो

अन्नू कपूर अभिनीत ‘हम दो हमारे बारा’ फिल्म आतां 14 जूनाक प्रदर्शीत जावपाचें. आज 7 जूनाक हें फिल्म भारतांतल्या मुखेल थेटरांनी प्रदर्शीत करपाचें थारिल्लें. मात, कांय मुस्लीम संघटणांनी हरकत घेवन मुंबय उच्च न्यायालयांत धांव घेवन फिल्माचे प्रदर्शन आडावपाची मागणी केल्ली. ताचेर, उच्च न्यायालयान निर्णय घेवपाखातीर म्हूण फिल्म सात दीस फुडें धुकलपाक सांगिल्लें.