भांगरभूंय | प्रतिनिधी
–थळाव्यां मदीं तिडक, पे पार्कींग शुल्क तकटे लावपाची मागणी
पणजीः पणजे स्मार्ट सिटीच्या रस्त्यांची कामां पुराय जावंक नासतना पणजे पे पार्कींग परतून सुरू केल्या. तशेंच पार्कींग शुल्काचें तकटे अजुनूय पोरणेंच आसात. कांय वाठारांनी ते अर्दकुटे उरल्यात. ताका लागून चड पयशे आकारप अशा विवीध कारणांक लागून राजधानी पणजेंत पे पार्कींगे वयल्यान थळाव्यांत परतून एकदा नाराजी पातळ्ळ्या. बिरेस्तारा हिंदू फार्मसी कडेन पार्कींग शुल्क दिवपा वयल्यान वाद जालो. ते उपरांत म्हापौर रोहीत मोंसेरात हांणी शुल्का विशीं लेखी कागाळ अायल्यार कारवाय करपाचें आस्वासन दिलां.
बिरेस्तारा हिंदू फार्मसी लागसार एका थळाव्यान मोटार पार्क केली. ह्या वेळार थंयचो पे पार्कींग कर्मचारी शुल्क घेवपा खातीर आयलो तेन्ना मोटार चालकान पे पार्किगाच्या तकट्याचेर शुल्क दाखोवपी भाग पिंजिल्ल्याचे सांगून पयशे दिवपाक न्हयकार दिलो. ह्या वेळार कर्मचारी आनी ते व्यक्ती मदीं शाब्दीक वाद जालो. स्मार्ट सीटीच्या कामांक लागून पणजेंतली पे पार्कींग 23 मार्च ते 31 मे मजगतीं बंद आशिल्ले. 1 जून पसून पे पार्कींग शुल्क परतून घेवपाक सुरू जाले उपरांत अशें प्रकार वाडत आसात.
पणजे पे पार्किंगाच्या नांवान वाहनचालकांची लूट चल्ल्या. पाटो वाठारांत नो पार्किंगांत लायिल्ल्या वाहनां कडल्यान पयशे आकारपाचो प्रकार घडिल्लो. फाटले वर्सभर पणजे जायत्या वाठारांनी पे पार्किंगाचें दर तकटे पिंजल्यात. ते अर्दकुटे अवस्थेंत आसात. गर्दी वा पर्यटक चड आसपी रस्त्या वयल्या पार्किंगाचे दर दाखोवपी तकटे अर्दकुटे आसात. ते खातीर पार्किंगाचो नेमको दर कितें ते समजना. ते खातीर पार्कींग शुल्क मनमानी पद्दतीन कर्मचारी आकारतात.
हे विशीं म्हापौर रोहीत मोंसेरात हांणी सांगलें, पणजेंतले पे पार्कींग विशीं हाचे पयलीं काय तोंडी कागाळी आयिल्ल्यो. त्या वेळार कंत्राटदाराक समज दिल्ली. मात म्हापालिके कडेन हे विशीं आतां मेरेन एकूय लेखी कागाळ येवंक ना. पर्यटक वा थळाव्यांनी लेखी कागाळ केल्यार आमी निश्चीत कारवाय करतले. पे पार्कींग परतून सुरू जाले पसून शुल्कांत कसलीच वाड करूंक ना.
——————-
पार्किंगाचे शुल्क तकटे बदलपाचे आदेश
कंत्राटदाराक पे पार्किंगाचे पोरणें शुल्क तकटे बदलून ताचे बदला नवे शुल्क दर तकटे लावपाचे आदेश दिल्यात. फुडल्या सप्तकांत पणजे नवे पार्कींग दर तकटे लायतले, अशें म्हापौर रोहीत मोंसेरात हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
