भांगरभूंय | प्रतिनिधी
-फिकल कॉलिफॉर्म जिवाणूंचें प्रमाण वाडिल्ल्याचें स्पश्ट
पणजीः प्रदुशण नियंत्रण मंडळान मार्च 2023 ते एप्रील 2024 ह्या काळांत राज्यांतल्यो न्हंयो, तळयो, व्हाळ, झरे, धरणां, दर्यादेगो तशेंच बोरवेलींतल्या उदकाच्या नमुन्यांची तपासणी केल्ली. हातूंत मुखेल न्हंया सयत हेर वाठारांतल्या उदक प्रदुशीत आशिल्ल्याचे दिसून आयला. कांय वाठारांत उदकाचो पीएच, उदकांतल्या प्राणवायूचें प्रमाण मर्यादे परस उणे जालां. जाल्यार कांय वाठारांन फिकल कॉलिफॉर्म ह्या घातक जिवाणूंचे प्रमाण वाडलां.
केंद्रीय प्रदुशण नियंत्रण मंडळाच्या नेमा प्रमाण राज्य प्रदुशण नियंत्रण मंडळान 2023-24 त वट्ट 115 अोलसाण वाठारांतल्या उदकाचे 1,214 नमुदे एकठांय केल्ले. 115 मदीं 107 वाठारांतल्या उदकाची दर म्हयन्याक तपासणी करतात. ह्या 115 तल्यान उत्तर गोंयांत 54 जाल्यार दक्षीण गोंयांत 61 वाठारांतल्या उदकाच्या नमुन्यांचो आस्पाव आसा. हातूंत न्हंयो, तळयो, बायो, झरे हांचे सयत 20 दर्यादेगो वयल्या उदकाच्या नमुन्याची तपासणी करतात. जाल्यार कांय उद्देगीक वसणुकेंत 8 वाठांरांनी जमनींतल्या उदकाची तपासणी करतात. ही तपासणी 6 म्हयन्यांतल्यान एकदा करतात.
प्रदुशण मंडळाच्या अहवाला प्रमाण कांय वाठारांनी साळ न्हंय, म्हापशें न्हंय, जुवारी, शापोरा, मांडवी, तेरेखोल, कोलवा खाडी, कुमारजुंवे कानालांतल्या उदकाच्या नुमन्यांत भोवतेक खेपे फिकल कॉलिफॉर्म ह्या जिवाणूंचें प्रमाण वाडिल्ल्याचे स्पश्ट जाला. ह्या जिवाणूंचे प्रमाण चड जाल्यार पोटाचे दुयेंस जावपाक शकतात. तशेंच तेरेखोल, मिरामार, कळंगूटे, मोरजे, मोबोर, गाजलीबाग, कोलवा, बाणावली, बेतातभाटी, वार्का, आगोंद, पाळोळे, राजबाग, वेळसांव, वागातोर, हमरल, बागा, बोगमाळो हांगाच्या दर्यादेग वाठारांतल्या उदकांत मॉन्सून काळांत फिकल कॉलिफॉमचें प्रमाण मर्यादे परस चड दिसून आयलें.
बेतोडे नालो, सांतीनेज खाडी, म्हापशें न्हंयेंतल्या उदकाच्या प्राणवायूचें प्रमाण भोवतेक खेपे उणें जाल्ल्याचे दिसून आयला. जाल्यार बायो केमिकल आॅक्सीजन डिमांड (बीओडी) प्रमाण भायर वाडलां. उदकांतल्या पीएचचें प्रमाण उणें जाल्यार उदकांतले आम्ल गुणधर्म वाडून ते सजिवांच्या भलायकेक घातक थारता. अहवाला प्रमाण खांडेपारची तळी, रायतळे, कांतुर्ली, पिळर्ण तळ्यांतल्या उदकाच्या नमुन्यांत कांय वेळार पीएचचें प्रमाण उणें जाल्ल्याचे दिसून आयलां.
————————-
अस्नोडें, व्हाळवाट न्हंय, हरवळे घसघसो, अंजुणें तलाव, कोडली खांडेपार न्हंय, रिवणची कुशावती न्हंय, तळपण न्हंय, साळावली आनी चापोली धरणांतल्या उदकांत पीएच, कॉलिफॉर्म, बीओडी, प्राणवायूचें प्रमाण हे सगले मर्यादीत प्रमाणांत आशिल्ल्याचे प्रदुशण नियंत्रण मंडळाच्या अहवालांत नमूद केलां.
——————-
कुंकळ्ळी उद्देगीक वसणुकेंतल्या उदकांत ‘ई कॉली’चें प्रमाण वाडलें
प्रदुशण नियंत्रण मंडळान कुंकळ्ळी उद्देगीक वसणूक वाठारांतल्या उदकाचो दर्जाची तपासणी केली. ते प्रमाण जानेवारी 2023 ते मार्च 2024 मजगतीं, दरेकी म्हयन्यांत बायो आनी बोअरवेलच्या उदकाची तपासणी केल्या. ह्या उदकांत प्रदुशीत घटकांचे प्रमाण उणें अाशिल्लें. पूूण उदकांत आयर्न आनी लोहखनिजाचें प्रमाण चड आशिल्ल्याचे दिसून आयला. तशेंच मनीस जिणेक घातक थारपाक शकपी ई-कॉली ह्या जिवाणूंच्या समुहाचें प्रमाण लेगीत चड आशिल्लें.
————————
बर्जर कंपनीच्या उज्या उपरांत पीएचचें प्रमाण जाले उणें
पोरूं पिळर्णा उद्देगीक वसणुकेंतल्या बर्जर कारखान्याक व्हड उजो लागपाची घडणूक घडिल्ली. प्रदुशण नियंत्रण मंडळान हो उजो नियंत्रणांत हाडले उपरांत कांय दिसांनी थंयच्या उदकाची चांचणी केल्ली. ते प्रमाण थंयच्या उदकांत पीएचचें प्रमाण उणें जाल्ल्याचे स्पश्ट जालें. सगल्या बायांनी ई-कॉलीचें प्रमाण वाडिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
