भांगरभूंय | प्रतिनिधी
-गुंतवणूकदारांचें 30 लाख कोटींचें लुकसाण-राहूल गांधींचो दावो, जेपीसी समिती वरवीं चवकशेची मागणी
नवी दिल्लीः लोकसभा वेंचणुकेंत एनडीएक भोवमत मेळ्ळां जाल्यार इंडी आघाडेक 232 सुवातो मेळ्ळ्यो. मात लोकसभा वेंचणुकेच्या आदीं एक्झीट पोल मुखार आयिल्ले. ह्या सगल्या एक्झीट पोलांत भाजपाक 300 च्या वयर सुवातो दाखयिल्लो. ते उपरांत शॅर मार्केटांत अचकींत मोट्या प्रमाणांत वाड जाल्ली. ताका लागून जायत्या गुंतवणूकदारांक व्हड फटको बसला. 4 जूनाक शॅर मार्केट गुंतवणूक करपी पांच कोटी लोकांचे वट्ट 30 लाख कोटींचें लुकसाण जालां. हाचेर आतां काँग्रेस फुडारी राहूल गांधी हांणी भाजपाचेर गंभीर आरोप केल्यात. शॅर मार्केटांत निकाला दिसा सगल्यांत व्हड भानगड जाल्या, असो दावो राहूल गांधी केला.
वेंचणुकेच्या आदीं एक्झीट पोल मुखार आयले तेन्ना शॅर मार्केट अचकींत वाडलें. पूण निकाला दिसा शॅर मार्केट अचकींत कोसळ्ळो. पूण ताचे आदीं प्रधानमंत्री नरेंद्र मोदी, गृह मंत्री अमीत शाह आनी निर्मला सीतारामन हांणी शॅर खरेदी करपाक सांगिल्लें, असो दावो राहूल गांधी हांणी केला. तांणी लोकांक शॅर मार्केटांत गुंतवणूक करपाक लायली. पूण 4 जून दिसा कितें जातलें?, वेंचणुकांचे निकाल कितें लागतले? हे तांकां खबर आशिल्ले. ते उपरांत शॅर मार्केट मोट्या प्रमाणांत कोसळ्ळो. हो देशांतलो सगल्यांत व्हड घोटाळो आशिल्ल्याचे राहूल गांधी हांणी म्हणलें.
—————————-
प्रधानमंत्री नरेंद्र मोदी हांणी देशांतल्या लोकांक शॅर मार्केटांत गुंतवणूक करपाक कित्याक लायली?, पांच कोटी लोक जे शॅर मार्केटांत गुंतवणूक करतात, तांकां मोदी हांणी शॅर मार्केटांत गुंतवणूक करपाक कित्याक सांगलें? असो प्रस्न राहूल गांधी हांणी केलो. तशेंच मोदी हांणी दोन चॅनलांक मुलाखती दिल्यो. तातूंतले एक चॅनल अदानींचे आसा. हातूंत ह्या चॅनलाची भुमिका कितें? एक्झीट पोल मुखार आयले आनी विदेशांतली गुंतवणूक वाडली, तातूंत भाजप आनी एक्झीट पोल हांचो कितें संबंद आसा? हाची चवकशी करपाची मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
