भांगरभूंय | प्रतिनिधी
पणजीः गोंयांतल्यान जळगांवां वचपी प्रवाशां मदीं खूब वाड जाल्या. हे खातीर गोंयचे फ्लाय 91 विमान कंपनीन गोंय ते जळगांव मेरेन उड्डाण करपी विमानांचो आंकडो वाडोवपाचो निर्णय घेतला.
मोपाच्या मनोहर आंतरराष्ट्रीय विमानतळा वयल्यान गोंय (GOX) ते जळगांव (JLX) विमान सेवा फाटल्या सप्तकांत सुरू जाली. दर दिसा सेवा सुरू करपा पयलीं हें विमान सप्तकांतल्यान चार फावटीं उड्डाण करतालें.
फ्लाय 91 कंपनीन 18 एप्रील 2024 सावन गोंय ते जळगांव मदीं विमान सेवा सुरू केल्ली. सप्तकांतल्यान चार फावटीं हीं उड्डाणां जातालीं. जळगांव शार हें विमानतळा वयल्यान उण्या अंतराचेर आशिल्ल्या इतिहासीक अजिंठा आनी एलोरा होवऱ्यांचें प्रवेशदार आसा. तशेंच ह्या शाराच्या दक्खन पठाराच्या उत्तर भागांत आशिल्लो जिल्लो केळीं खातीर फामाद आसा.
फ्लाय 91 विशीं म्हायती
फ्लाय 91 ही गोंयांतली एक प्रादेशीक विमान कंपनी. भारतांतल्या ल्हान शारांनी हवाई संपर्क सुदारपाचो तिचो हेतू आसा. अणभव आशिल्ल्या वेवसायिकांनी स्थापन केल्ली आनी निधीच्या आदारान फ्लाय 91 फुडल्या पांच वर्सांत 50 शारांक जोडपाची येवजण करता. तें 30 विमानां जोडटले जी देशभरांतल्या वेगवेगळ्या केंद्राचेर आसतलीं. तांची सुरक्षीतताय, कार्यक्षमताय आनी तिगोवन उरपा खातीर तांणी एटीआर 72- 600 विमानांची निवड केल्या. हे विमान सेवे विशीं चड म्हायती खातीर www.fly91.in ह्या संकेतथळाक भेट दिवची, अशें पत्रकांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
