मुरगांव पालिके मुखार विक्रेत्यांचें आव्हान

भांगरभूंय | प्रतिनिधी

काडिल्लें अतिक्रमण कामगारांची फाट जातकूच परतून रस्तो आडयता

भांगरभूंय । प्रतिनिधी

वास्कोः वास्को भाजी मार्केटांतल्या विक्रेत्यांनी मुरगांव पालिके मुखार आव्हान उबें केलां. त्या विक्रेत्यांचीं रस्त्या वयलीं अतिक्रमणां काडले उपरांत फक्त कांय मिण्टां भितर ते परतून रस्त्याचेर अतिक्रमण करतात. अतिक्रमण करपी विक्रेत्यांक राजकी आशिर्वाद आशिल्ल्यान ते मुरगांव पालिकेक भियेनात. ताका लागून सध्या मुरगांव पालिकेची मोहीम म्हणल्यार तूं मारिल्ले वरी कर, हांव रडिल्ले वरीं करता, अशी जाल्या.

नव्या भाजी मार्केटांत आदीं गाडयो सहज तरेन व्हरपाक मेळटाल्यो, पूण ल्हवू ल्हवू ह्या मार्केटांतल्या विक्रेत्यांनी आपल्या दुकाना मुखा वयल्या रस्त्याचेर अतिक्रमण करून म्हालविक्री सुरू केल्या. अर्दो अदीक रस्त्याचेर अतिक्रमण जाल्ल्यान मार्केटांत गाडयो वचपाच्यो बंदूच जाल्यो. चलत वचप्यांकूय धड सारकें चलपाक मेळना. हे आदीं मुख्याधिकारी अग्रवाल, एल्वीस गोम्स हांणी ह्या अतिक्रमणांचेर योग्य अंकूश दवरिल्लो. पूण ते उपरांतच्या मुख्याधिकाऱ्यांनी जाय तशें लक्ष दिवंक नाशिल्ल्यान भाजी मार्केटांतल्या त्या विक्रेत्यांनी मुरगांव पालिके मुखार आव्हान उबें केलां. संबंदीत दुकामकार आपल्या दुकानांतलो म्हाल रस्त्याचेर मांडटात. ताका लागून दोनूय वटांनी अतिक्रमण जाता. ताका लागून रस्त्या वयल्यान वचप्यांक एके तरेची कसरत करची पडटा.

ह्या विक्रेत्यांनी आपलो म्हाल वता- पावसा पासून वाटावचो हे खातीर दुकाना मुखारूच व्हड व्हड प्लास्टीक ताडपत्र्यो बांदल्यांत. ह्या ताडपत्र्यांचो त्रास गिरायकांक सोंसचो पडटा. त्यो ताडपत्र्यो काडच्यो हे खातीर सेगीत विनवण्यो करतात. जेन्ना मुरगांव पालिकेचे कामगार येतात तेन्ना ताडपत्र्यो काडटात, मात ताची फाट जातात त्यो परतून बांदतात. ताका लागून कामगार लेगीत बेजारल्यात. अतिक्रमण करप्यां आड खर कारवाय करपाची गरज आसा, पूण मुरगांव पालिकेचे अधिकारी त्या विक्रेत्या मुखार बाबडे कित्याक जातात तें कळपाक मार्ग ना. ताडपत्र्यो काडात, रस्त्या वयलीं अतिक्रमणां काडात, अशें कामगार सांगतात, पूण तांचें कोणूच आयकनात. कामगारां वांगडा मुरगांव पालिकेचो पालिका निरिक्षक, अधिकारी आसप गरजेचें आसा, अशें थळाव्या लोकांचें म्हणणें आसा.