भांगरभूंय | प्रतिनिधी
1 जानेवारी ते 31 मार्च 2024 ह्या काळांत गोंय येरादारी पुलीस विभागाची कारवाय
भांगरभूंय । प्रतिनिधी
पणजीः गोंयांत 1 जानेवारी 2024 ते 31 मार्च 2024 ह्या तीन म्हयन्यांच्या काळांत येरादारी नेम मोडिल्ले खातीर गोंय पुलिशेच्या येरादारी विभागान 5,211 वाहन चालकांचें परवाने निलंबीत करचे खातीर शिफारस केल्ली. तातूंतल्या 4,025 वाहन परवाने येरादारी खात्यान निलंबीत केल्यात. तातूंतले सगळ्यांत चड 2,824 जाणांचे हॅल्मेट घालूंक नाशिल्ले खातीर जाल्यार 171 जाणांचे वाहन परवाने सोरो पियेवन गाडी चलयिल्ले निलंबीत केल्यात.
वाडट्या रस्तो अपघातांनी मरणांची संख्या वाडत आशिल्ल्याची दखल घेवन सर्वोच्च न्यायालयान रस्तो सुरक्षा समिती स्थापन केल्ली. हे समितीन येरादारी नेम पाळिनाशिल्ल्यांचे परवाने तीन म्हयन्यां खातीर निलंबीत करपाची शिफारस केल्या. ते प्रमाण गोंय पुलिशेच्या येरादारी विभागान वयल्या तीन म्हयन्यांत 5,211 जाणांचे वाहन परवाने निलंबीत करपाची शिफारस केल्ली.
तातूंत सगळ्यांत चड हॅल्मेट घालूंक नाशिल्ले 3,361, अतीवेगान वाहन चलयिल्ल्यान 1,002, मोबायलाचो वापर केल्ल्यान 280, सोरो पियेवन गाडी चलयिल्ले खातीर 239, येरादारी सिग्नल पाळूंक नाशिल्ल्यान 197, म्हालवाहू गाडयेंतल्यान प्रवाशांक व्हेल्ले खातीर 35, घाळपणान गाडी चलोवन अपघात केल्ले खातीर 6, दुचाकी फाटल्यान दोग वा ताचे परस चड जाणांक बसोवन गाडी चलयिल्ले खातीर 90 आनी सीट बेल्ट घालूंक नाशिल्लो 1 धरून 5,211 जाणांचे वाहन परवाने निलंबीत करपाची शिफारस येरादारी पुलिसांनी केल्ली. तातूंत सगळ्यांत चड हॅल्मेट घालूंक नाशिल्ल्यान 2,824, अतिवेगान गाडी चलयिल्ल्यान 561, गाडी चलयतना मोबायल फोनाचो वापर केल्ल्यान 230, सोरो पियेवन गाडी चलयिल्ले खातीर 171, येरादारी सिग्नल पाळूंक नाशिल्ल्यान 122, म्हालवाहू गाडयेंतल्यान प्रवाशांची येरादारी केल्ले खातीर 34, घाळपणान गाडी चलोवन अपघात केल्ले खातीर 4, दुचाकी फाटल्यान दोग वा ताचे परस चड जाणांक बसयिल्ले खातीर 78 आनी सीट बेल्ट घालूंक नाशिल्ल्यान एकल्याक धरून 4,025 जाणांचे वाहन परवाने खात्यान निलंबीत केल्यात.
देशांत दिसान दीस रस्तो अपघाती मरणांत वाड जाता ताची दखल घेवन सर्वोच्च न्यायालयान न्यायमुर्ती अभय मनोहर सर्पे हांचे अध्यक्षते खाला नवो रस्तो सुरक्षा समिती स्थापन केल्या. मोटार वाहन कायदो 1988 च्या कलम 19 आनी केंद्रीय मोटार वाहन नेम 1989 च्या कलम 21 प्रमाण वाहन परवानो निलंबन करपाची तजवीज आसा. हे कार्यवाहीची अंमलबजावणी करपाची शिफारस समितीन देशांतल्या सगळ्या राज्यांक तशेंच संघ प्रदेशांक निर्देश दिल्ले.
हे समितीन अपघात, रस्ते बांदपाचें काम, अपघाती मरण तशेंच हेर संबंदीत विशयाचो अभ्यास करून अहवाल तयार केला आनी राज्य सरकारांक मार्गदर्शक तत्वां जारी केल्यात.
ह्या मार्गदर्शक तत्वा प्रमाण अतिवेगन गाडी चलोवप, जंक्शना लागसार आशिल्ल्या येरादारी सिग्नलाक पाळो दिवप ना, म्हालवाहू गाडयेंतल्यान प्रवाशांची येरादारी करप, म्हालवाहू गाडयेंतल्यान तांकी परस चड म्हालाची येरादारी करप, सोरो पियेवन गाडी चलोवप आनी गाडी चलयतना मोबायलाचेर उलोवचें न्हय ह्या येरादारी नेमां खातीर चालकाचो उण्यांत उणे तीन म्हयन्यां खातीर वाहन परवानो निलंबीत करपाची तजवीज केल्या.
हे समितीच्या मार्गदर्शक तत्वा प्रमाण सोरो पियेवन गाडी चलयिल्ल्या प्रकरणांत वाहन चालकाचो वाहन परवानो निलंबीत करपाचो अधिकार प्रथमवर्ग न्यायालयाक दिला. जाल्यार वयल्या हेर नेम मोडिल्ले खातीर कारवाय करपाचे अधिकार येरादारी खात्याक दिल्यात. अहवाल मेळ्ळे उपरांत संबंदीत वाहन चालकाक न्यायालयांत वा येरादारी खात्यांत हाजीर रावपाक समन्स काडटात. ते उपरांत ह्या प्रकरणांत रितसर सुनावणी घेवन उपरांत दोशी सांपडलो जाल्यार ताचे परवाने तीन म्हयन्यां खातीर निलंबीत करतात.
मडगांव वाठारांत सगळ्यांत चड वाहन परवाने निलंबीत
गोंयांत येरादारी खात्याचे 10 येरादारी विभाग आसात. ते प्रमाण येरादारी खात्याच्या विवीध वाठारांतल्या विभागाची दखल घेतल्या. सगळ्यांत चड मडगांव येरादारी विभागान 1,407 वाहन परवाने रद्द केल्यात. ते उपरांत म्हापशें 871, दिवचल 662, वास्को 311, केपें 285, पेडणें 180, पणजी 145, फोंडें 124, काणकोण 34 आनी धारबांदोडें 6 मेळून 4,025 वाहन परवाने निलंबीत केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
