भांगरभूंय | प्रतिनिधी
प्रवेशाची पयली फेरी फाल्यां सावन सुरू
पणजी, प्रतिनिधी: सरकारी तंत्रनिकेतनांतल्या (पॉलिटॅक्नीक) पदविका अभ्यासक्रमाच्या १२०० जागां खातीर १८०० विद्यार्थ्यां कडल्यान अर्ज आयल्यात. प्रवेशाची पयली फेरी फाल्यां शुक्रारा सुरू जाता. शुक्रार ते मंगळार मेरेन प्रवेशाची फेरी चलतली.
तांत्रीक शिक्षण उपसंचालक प्रदीप कुस्नूर हांणी ही म्हायती दिली. पयल्या प्रवेश फेरये उपरांत सुवातो खाली उरल्यार सरळ प्रवेश (ऑन द स्पॉट) प्रक्रीया जातली. ह्या वेळार जेणी कोणी अर्ज करूंक ना, तांकांय अर्ज सादर करून प्रवेश घेवप शक्य जातलें. जितल्यो सुवातो खाली उरता ते प्रमाण विद्यार्थ्यांक प्रवेश मेळटलो, अशी म्हायती अधिकार्यांनी दिली.
सरकारी तंत्रनिकेतन, आल्तिनो (पणजी), सरकारी तंत्रनिकेतन मयें – दिवचल, सरकारी तंत्रनिकेतन कुडचडें, फादर आग्नेल, वेर्णा, इन्स्टिट्युट ऑफ शिपबिल्डींग, गोवा कॉलेज ऑफ फार्मसी (डी. फार्म), गार्डियन एंजल इन्स्टिट्युट ऑफ हॉटेल मॅनेजमेंट ह्या संस्थांनी पदविका अभ्यासक्रम आसा. ह्या संस्थांनी तांत्रिक शिक्षण संचालनालया वरवीं वांगडाच प्रवेश परीक्षा जाता. इलेक्ट्रीकल, सिवील, मेकॅनिकल, इलेक्ट्रॉनिक्स ह्या पदविका अभ्यासक्रमाक चड मागणी आसा. फुड टेक्नोलॉजी, गार्मेंट टेक्नोलॉजी, मेडिकल इलेक्ट्रॉनिक्स ह्या अभ्यासक्रमांचे तुळेंत उणी मागणी आसा. हाका लागून फुड टेक्नोलॉजी, गार्मेंट टेक्नोलॉजी, मेडिकल इलेक्ट्रॉनिक्स ह्या अभ्यासक्रमाच्यो बर्योच सुवातो खाली उरतात, अशी म्हायती अधिकार्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
