भांगरभूंय | प्रतिनिधी
पणजी, बातमीदार ः गोंयांतल्यान जळगांवाक वचपी प्रवाशां मदीं बरीच वाड जाल्या. हे खातीर गोंयच्या फ्लाय 91 विमान कंपनीन गोंय सावन जळगांव मेरेन उड्डाण करपी विमानांचो आंकडो वाडोवपाचो निर्णय घेतला.
मनोहर आंतरराष्ट्रीय विमानतळा वयल्यान गोंय (GOX) ते जळगांव (JLX) विमान सेवा फाटल्या सप्तकांत सुरू जाली. दर दिसा सेवा सुरू करपा पयलीं हें विमान सप्तकांतल्यान चार फावटीं उड्डाण करतालें.
फ्लाय 91 कंपनींन 18 एप्रिल 2024 सावन गोंय ते जळगांव मदीं विमान सेवा सुरू केल्ली. सप्तकांतल्यान चार फावटीं ह्यो उड्डाणां जाताल्यो. जळगांव शार हें विमानतळासावन थोड्याच अंतराचेर आशिल्ल्या इतिहासीक अजिंठा आनी एलोरा लेण्यांचें प्रवेशदार आसा. तशेंच ह्या शाराच्या दक्खन पठाराच्या उत्तर भागांत आशिल्लो जिल्लो केळीं खातीर फामाद आसा आनी केळीं हें गिरेस्त शार म्हणून वळखतात.
फ्लाय 91 विशीं म्हायती
फ्लाय 91 ही गोंयांतली एक प्रादेशिक विमान कंपनी आसून भारतांतल्या ल्हान शारांनी हवाई संपर्क सुदारपाचो हेतू आसा. अणभव आशिल्ल्या वेवसायिकांनी स्थापन केल्ली आनी निधीच्या आदारान फ्लाय 91 फुडल्या पांच वर्सांत 50 शारांक जोडपाची येवजण करता. तें 30 विमानां जोडटले जी देशभरांतल्या वेगवेगळ्या केंद्राचेर आसतली. तांची सुरक्षीतताय, कार्यक्षमताय आनी तिगोवन उरपा खातीर तांणी एटीआर 72- 600 विमानांची निवड केल्या. ह्या विमान सेवा विशीं चड म्हायती खातीर www.fly91.in ह्या संकेतथळाक भेट दिवची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
