भांगरभूंय | प्रतिनिधी
नवी दिल्ली, खबरां संस्था ः भारतीय वंशाची अंतराळवीर सुनीता विल्यम्स हिणें बुधवारा (5 जून) तिसरे खेपे अंतराळांत येसस्वीपणान उड्डाण केलें. अंतराळांत चांचणी मिशनाचेर नवे अंतरिक्षयान उडोवपी सुनीता विल्यम्स ही पयली बायल थारली. 58 वर्सां पिरायेची सुनीता विल्यम्स हिणें 5 जून दिसा फ्लोरिडाच्या केप कॅनाव्हरलांतल्यान नासाचे अंतराळवीर बॅरी “बुच” विल्मोर हांचे वांगडा बोइंगच्या स्टारलायनर कॅप्सूलांतल्यान उड्डाण केलें. आंतरराश्ट्रीय अंतराळ केंद्राचेर वचपी पयली वांगडी जावन तिणें नवो इतिहास निर्माण केलो.
बोईंग क्रू फ्लाइट टेस्ट (CFT) नांवाच्या ह्या मिशनाची सुरवात नासाच्या कमर्शियल क्रू प्रोग्रामच्या रुपात सुरु जाली. आंतरराश्ट्रीय अंतराळ केंद्राचेर नेमान क्रू फ्लायट खातीर स्टारलायनराक प्रमाणीत करपाचें हें एक म्हत्वाचें पावल. जर हें मिशन येसस्वी जालें जाल्यार अंतराळवीरांक कक्षेतल्या लॅबात व्हरपी आनी थंय सावन हाडपी स्टारलायनर हें स्पेसएक्साच्या क्रू ड्रॅगन उपरांतले दुसरें खाजगी अंतरिक्षयान जातलें.
सुनीता विल्यम्स हांचे खातीर हे उड्डाण तिच्या कारकिर्दींतलो आनीक एक मोलादीक फातर थारता. हाचे आदीं 2006-2007 आनी 2012 वर्सा आंतरराष्ट्रीय अंतराळ केंद्राचेर केल्ल्या मिशनांत सुनीता विल्यम्स हिणें सगळ्यांत चड स्पेसवॉक (7) आनी स्पेसवॉक टायम (50 वरां, 40 मिनटां) करपाचो विक्रम रचिल्लो.
उड्डाण केल्या उपरांत स्टारलायनर कॅप्सूल सुमार 26 वरां उपरांत आंतरराष्ट्रीय अंतराळ केंद्रा कडेन डॉक करपाचो यत्न करतली. जांतूत सुनीता विल्यम्स, विल्मोर आनी ऑर्बिटिंग आउटपोस्ट खातीर 500 पाउंडां परस चड कार्गो आसतलें.
सुनीता विल्यम्स एक सप्तक अंतराळात रावतली
नासाच्या म्हणण्या प्रमाण सगळें बरें जालें जाल्यार स्टारलायनर आंतरराश्ट्रीय अंतराळ केंद्राचेर देंवतलें. ते उपरांत अंतराळवीर सुनीता विल्यम्स आनी सहकारी बुच विल्मोर हे दोगूय सुमार एक सप्तक अंतराळांत रावपाचे आसात. थंय ते आपलें मिशन चालू दवरतले, ह्या वेळार स्टारलायनर आनी ताच्या उपप्रणालींची चांचणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
