भांगरभूंय | प्रतिनिधी
नवी दिल्ली, खबरां संस्था ः हे अठरावे लोकसभेंत 74 बायलां खासदार वेंचून आयल्यात. 2019 वर्साचे लोकसभेंत 78 बायलां खासदार वेंचून आयिल्ल्यो. ताका लागून फाटले लोकसभेचे तुळेंत हे खेप बायलां खासदारांची संख्या चार आंकड्यान उणी जाल्या. 1952 वर्सा जाल्ले पयले लोकसभा वेंचणुकेंत फकत 22 बायलो खासदार वेंचून आयिल्ल्यो.
पयले वेंचणुकेंत 22 बायलां खासदार वेंचून आयले उपरांत लोकसभेंत बायलांचें प्रतिनिधित्व ल्हव ल्हव वाडलें. 1952 वर्सा लोकसभेंत बायलां वांगड्यांची टक्केवारी फकत 4.41 टक्के आशिल्ली. ते उपरांत 10 वर्सां उपरांत जाल्ले लोकसभेचे वेंचणुकेंत ह्या वांगड्यांची संख्या स टक्क्यांनी वाडली. पूण 1971 वर्साचे वेंचणुकेंत तांतूत परतून उणाव आयलो आनी ह्या वांगड्यांचो आंकडो चार टक्क्यांचेर पावलो. हांचे उपरांत लोकसभेंत बायलां वांगड्यांची संख्या परतून वाडूंक लागली. 2009 वर्साचे लोकसभा वेंचणुकेंत पयलेच खेपे 10 टक्क्यां परस चड बायलां वांगडी वेंचून आयल्यो. 2019 वर्साचे लोकसभा वेंचणुकेंत सगळ्यांत चड म्हळ्यार 14.36 टक्के बायलां वांगड्यांची संसदेंत निवड जाली. पूण अजूनय हेर देशां कडेन तुळा केल्यार भारतीय संसदेंत बायलां वांगड्याचें प्रमाण खूब उणें आसा. हेर देशांतल्या बायलां संसद वांगड्याचें प्रमाण पळयल्यार दक्षीण आफ्रिकेंत 46 टक्के, युनायटेड किंगडमांत 35 टक्के आनी अमेरिकेंत 29 टक्के इतले आसा.
2024 वर्साचे लोकसभा वेंचणुकेंत वट्ट 8360 उमेदवार आशिल्ले. तातूंत फकत 10 टक्के बायलां उमेदवार आशिल्ल्यो. वेंचणुकेच्या मळार प्रवेश करपी बायलांचोय आंकडो ल्हव ल्हव वाडत आसा. 1957 वर्सा जाल्ले दुसरे लोकसभा वेंचणुकेंत फकत तीन टक्के बायलां उमेदवार आशिल्ल्यो. ते वेळार पयलेच खेपे वेंचणुकेंत बायलां उमेदवारांचो आंकडो 10 टक्क्यांनी हुंपलो. देशभरांतल्या वट्ट भाजपाच्या उमेदवारांतले 16 टक्के बायलां उमेदवार आशिल्ल्यो. जाल्यार काँग्रेसीच्यो 13 टक्के बायलां उमेदवार आशिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
