नोकरेचें हांयस दाखोवन भारतीय तरणाट्यांक डंकी रूटान व्हरतात परदेशांत

भांगरभूंय | प्रतिनिधी

नवी दिल्ली, खबरां संस्था ः परदेशांत नोकरी सोदपी लोकांच्या असहाय्यतायेचो फायदो घेवपा खातीर मानवी तस्करांचो एक गट भारतांत वावुरता. देशांतल्या 8 राज्यांचे स्पेशल सेल आनी गुन्यांव फांटे ह्या गटाच्या वांगड्यांक सोदतात. हो गट लोकांक परदेशांत नोकरी दिवपाचें हांयस दाखोवन भारतीय तरणाट्यांक 6,406 किमीच्या डंकी रूटान (चोरयेचो मार्ग) व्हरता आनी युएई, व्हिएतनाम, लाओस, कंबोडिया ह्या देशांनी तांकां मजूर म्हणून विकतात. थंय जायत्या जाणांची हत्या करुन तांचे अवयव लेगीत विकतात.
कांय गुप्तचर संस्थांच्या म्हणण्या प्रमाण, ह्या गटान एका वर्सांत 1500 परस चड लोकांक डंकी रूटान हेर देशांनी धाडून 1000 कोटी रुपया परस चड मेळयल्यात. ह्या आंतरराष्ट्रीय गटाक धरपा खातीर देशांतल्या 8 राज्यांच्या पुलिसांनी आतां एनआयएची मजत मागल्या. ते प्रमाण तपास सुरु आसा.
चड म्हायती प्रमाण, मानवी तस्करी गटां कडेन संबंदीत आशिल्ल्या जायत्या कन्सलटन्सी कंपनींनी भारतांत कार्यालयां उबारल्यांत. परदेशांत काम करपाक सोदपी तरणाटे हांगा संपर्क करतात. ह्या तरणाट्यांची मुलाखत घेतात आनी तांचे मदीं कितें तरी उणाव सोदून काडून तांकां न्हयकारतात. परदेशांत वचपाक सोदपी मनीस शिकिल्लो आनी कागदपत्रां अधिकृत आसल्यार 5 ते 10 लाख आनी कागदपत्रां नाशिल्ल्यां कडल्यान 5 ते 50 लाख शुल्क घेतात.
मानवी तस्करीच्या पंगडाची चनकशी करतना तपास एजन्सींक तांच्या 6,406 किमीच्या डंकी रूटाची म्हायती मेळ्ळी. परदेशांत काम करपाक सोदपी पूण तांचे कडेन अधिकृत कागदपत्र वा शिक्षणीक पात्रताय नाशिल्ल्या पयलीं मणिपूरांतल्या मोरे हांगा व्हरतात. थंयच्यान तांकां बेकायदेशीर रितीन शिमो हुपून म्यानमारांतल्या मांडले वा ने पी तॉ हांगा व्हरतात. थंय सावन परतून बेकायदेशीर रितीन थायलंडांतल्यान थेट कंबोडियाचे शिमे मेरेन 2 ते 3 दिसांचो 757 किमी प्रवास करतात. थायलंडचो बनावट पासपोर्ट दाखोवन चेक पोस्टांतल्यान पर्यटन व्हिसा घेवन कंबोडियांत हाडटात. हांगाच्यान व्हिएतनाम मेरेनचो 587 किमीचो प्रवास एकाच दिसांत पुराय करतात. हांगा परतून ह्या लोकांक व्हिएतनामांतलो बनावट व्हिसा दाखोवन पर्यटन व्हिसाचेर लाओसाक धाडटात. हांगा ह्या लोकांक गोल्डन ट्रँगल एसईझेडांत मजूर म्हणून विकतात.