भांगरभूंय | प्रतिनिधी
धर्तरेचेर अस्तित्वांत आशिल्ले म्होंवामूस लाखांनी वर्सां सावन म्होंव तयार करतात. म्होंवामुसांनी तयार केल्ल्या म्होंवाचे जायते फायदे आसात. म्होंवांत जायती पुश्टीक तत्वां, खनिजां आनी जीवनसत्वां आसतात. म्होंवांतली सगळ्यांत खाशेली गजाल म्हळ्यार तातूंत अँटीबॅक्टेरियल आनी अँटीसेप्टीक गुणधर्मूय आसतात, ज्यो जायत्यो समस्या पयस करपाक शकतात. मनशाक ही खाशेली भेट दिवपी म्होंवामूस आपलें पुराय जिवीत एक चमचो म्होंव तयार करपाक घालयता. म्होंवामुसां विशीं कांय अजाप करपा सारक्यो गजाली जाणून घेवया, ज्यो तुमकां खबर नासूंये!
१) म्होंवामूस लाखांनी वर्सां सावन धर्तरेचेर रावून म्होंव तयार करतात.
२) धर्तरेचेर २० हजारां परस चड म्होंवामुसांच्यो जाती आसात, तातूंतल्यो फकत ५ जाती म्होंव तयार करतात.
३) एका पोळ्यांत ५० हजार म्होंवामूस आसूं येतात. तांचें पोळे मेणापसून तयार जाता, जें तांच्या पोटांतल्या ग्रंथींतल्यान भायर सरता.
४) पोळ्यांत फकत तीन तरेचे म्होंवामूस रावतात. हजारांनी मादी म्होंवामूस एका पोळ्यांत रावतात. तशेंच शेंकड्यांनी नर म्होंवामूस (ड्रोन) आनी फकत एक राणी म्होंवामूस आसता.
५) पोळ्यांत रावपी मादी म्होंवामुसांक कामगार म्हणटात. कारण हे म्होंवामूस म्होंव तयार करपाक वावुरतात. नर म्होंवामूस फकत राणी म्होंवामुसा कडेन संभोग करपा खातीर आसतात.
६) पोळ्यांत रावपी शेंकड्यांनी नर म्होंवामूस राणयेक गर्भधारणा दिवपाचो यत्न करतात पूण तातूंतल्या एकाच म्होंवामुसाक हातूंयत येस येता.
७) पोळ्यांतली राणी म्होंवामूस फकत तांतयां घालता. ती एका दिसांत २००० परस चड तांतयां घालता. गिमाच्या प्रजनन हंगामांत हो आंकडो २५०० मेरेन पावूंक शकता.
८) म्होंवामुसांचें आयुश्य चडांत चड एक म्हयनो आसता. पूण राणी म्होंवामूस खूब वर्सां जियेवंक शकता. तिचें वजन आनी आकार हेर म्होंवामुसां परस चड आसता.
९) एक म्होंवामूस वराक २५ किलोमीटर वेगान उडपाक शकता. तो एका सेकंदात २०० फावटीं पांखां हुबयता.
१०) म्होंवामुसांची मनशा परस वासाची जाणविकाय बरी आसता. म्होंवामूस आपले पुराय जिणेंत फकत चमच्याच्या म्होंवाचो १२वो वांटो तयार करूंक शकता.
११) म्होंवामूस ५५,००० मैल (८८,५१४ किलोमीटर) प्रवास करून एक पावंड (४५४ ग्राम) म्होंव तयार करतात. जें आमी कांय सप्तकां भितर खावन उडयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
