भांगरभूंय | प्रतिनिधी
नोटाचे संख्येंत उणाव; पोस्टल मतांचे संख्येंत वाड
मडगांव: दक्षीण गोंय लोकसभा वेंचणुकेंत भाजप आनी काँग्रेस ह्या दोनूय पक्षांच्या मतांनी फाटले वेंचणुके परस अंदूंचे वेंचणुकेंत मतांनी वाड जाल्ल्याचें दिसून आयलें. तशेंच फाटले वेंचणुकेंत नोटा पर्यायाक 5436 मतां जाल्यार ह्या वेळार 4837 मतां पडलीं. पोस्टल मतदान करप्यांचे संख्येत वाड जाल्या. फाटले वेंचणुकेंत तिसऱ्या क्रमांकाचेर आशिल्ल्या आप पक्षा परसूय आरजी पक्षाक उणीं मतां मेळिल्ल्याचें दिसून आयलें.
लोकसभा वेंचणुकेचो निकाल पळयत जाल्यार भाजप आनी ह्या दोनूय पक्षां मदीं खरी लडत जाल्ल्याचें दिसून येता. रेव्होल्युशनरी गोवन्स पक्षाचे उमेदवार रुबर्ट परेरा हांकां 18885 मतां पडलीं आनी ते तिसऱ्या क्रमांकाचेर उरले. 2019 वर्सा आम आदमी पक्ष तिसऱ्या क्रमांकाचेर आशिल्लो आनी तांची मतां 20891 इतलीं आशिल्लीं. ताका लागून आरजीक अजूनय ताचे परस बरी कामगिरी करूंक आयली ना. काँग्रेस पक्षाक फाटले वेंचणुकेंत 201561 जाल्यार भाजपाक 191806 मतां पडिल्लीं. जाल्यार ह्या वेळार काँग्रेसीक 217836 आनी भाजपाक 204301 मतां मेळ्ळीं. ह्या वेळार काँग्रेसीच्या मतांत 16275 मतांनी आनी भाजपाच्या मतांत 12495 मतांनी वाड जाली.
नोटा ह्या पर्यायाचो वापर ह्या वेळार 4837 मतदारांनी केलो. जाल्यार फाटले वेंचणुकेंत 5436 मतदारांनी नोटा पर्याय वेंचिल्लो. 2019 वर्सा नोटाची मतां 918 आशिल्लीं आनी तातूंत पोस्टल 17 मतां नोटाक आशिल्लीं. ह्या वेळार मतदान चड जालें तरी लेगीत नोटा उण्या मतदारांनी वापरलो. ह्या वर्सा पोस्टल मतांत वाड जाली आनी 2495 मतदारांनी पोस्टल मतदान केलें, आनी तातूंतलीं फक्त 22 मतां नोटाक आसात. दोनूय वेंचणुकेंत पोस्टल मतदान भाजपाक चड जाल्ल्याचें दिसता.
नुवें, वेळ्ळी, बाणावले काँग्रेसीक तेंको
दक्षीण गोंयांत काँग्रेसीचे दोनूच आमदार आसून कुंकळ्ळे 6032 आनी केप्यां 784 मतांची आघाडी मेळ्ळी. तशेंच आपचे आमदार आशिल्ल्या बाणावली मतदारसंघांत 14181 आनी वेळ्ळी 13350 मतांची आघाडी काँग्रेसीक मेळ्ळी. जाल्यार भाजपाचे मंत्री आशिल्ल्या नुवें मतदारसंघांत काँग्रेसीन 10895 मतां घेतलीं. तशेंच नावेली 5770 मतां घेवन ही वेंचणूक खऱ्या अर्थान जिखली. तशेंच अपक्ष आमदारांच्या कुडटरी आनी कुठ्ठाळेंतूय काँग्रेसीक चड मतां मेळ्ळीं. आमदार आनी मंत्री आशिल्ल्या मतदारसंघांतल्या मतांचो फरक भाजपाक मारक थारलो.
धर्मसंस्थेच्या संदेशाक लागून
ख्रिस्ती मतदार कॉंग्रेसी बरोबर
लोकसभा वेंचणुकेच्या मतदाना दिसाच आमदार निलेश काब्राल हांणी कांय चर्च धर्मसंस्थां कडल्यान भाजपा आड प्रचार केल्ल्याचो दावो केल्लो. चर्च धर्मसंस्थेन लोकांक सेक्युलर पक्षाक मतदान करपाचें आवाहन केलें आनी साश्टींतले ख्रिस्ती मतदार काँग्रेसी बरोबर राविल्ल्याचें दिसून आयलें. हे विशीं आतां भाजपा प्रदेशाध्यक्ष सदानंद तानावडे, मंत्री सुभाष फळदेसाय हांणीय वक्तव्यां करून धर्माच्या आदाराचेर मतदान जाल्ल्यान फटको बशिल्ल्याचें म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
