भांगरभूंय | प्रतिनिधी
बॉलरांच्या उत्कृश्ट प्रदर्शना उपरांत मॅक्स ओ’डावडाच्या नाबाद 54 धांवड्यां नेटार नॅदरलॅण्डान संवसारीक टी-20 क्रिकेट सर्तीच्या डी गटांतले मॅचींत नेपाळ पंगडाक 6 विकेटींनी हारयलो.
पावसाक लागून उसरा सुरू जाल्ले संवसारीक टी-20तले सातवे मॅचींत नॅदरलॅण्डान टॉस जिखून पयलीं बॉलींग करपाचो निर्णय घेतलो. नेपाळाची सुरवात सामकी बाबत जाली. 3.1 ओव्हरींनी 15 धांवड्यो करून ताणें दोन म्हत्वाच्यो विकेटी व्हगडायल्यो. ते उपरांत लेगीत नॅदरलॅण्डाच्या एकाय बॉलरा मुखार नेपाळाच्या बॅट्समनांक तग धरपाक जमूंक ना. मुखेली रोहीत पॉडेलान सगल्यांत चड 37 धांवड्यो केल्यो. अनील साहान 11, गुलशन झान 14 आनी केसी करणान 17 धांवड्यो केल्यो. स बॅट्समनांक दोट्टी आंकडो लेगीत हुपपाक जमलो ना. नेपाळाचो डाव 19.2 ओव्हरींनी 106चेर सोंपलो.
नॅदरलॅण्डा वतीन टीम प्रिंगल, लोगन वॅन बीक हांणी दरेकी तीन विकेटी घेतल्यो. पॉल वॅन मिकरेन आनी बास डलिडे हाणें दरेकी 2 विकेटी मेळयल्यो.
मोखीचो फाटलाव करपी नॅदरलॅण्डाची लेगीत सुरवात बरी जाली ना. दुसरे ओव्हरींत मायकल लेविट (1) बाद जालो. ते उपरांत मॅक्स ओ’डावडान विक्रमजीत सिंग वांगडा मेळून डाव सांबाळ्ळो. दोगांयनी दुसरे विकेटी खातीर 40 धांवड्यांची भागिदारी केली. विक्रमजीत सिंग 22 धांवड्यो करून बाद जालो. मॅक्स ओ’डावड 48 बॉलांनी नाबाद 54 धांवड्यांची खेळी केली. नॅदरलॅण्डान 18.4 ओव्हरींनी 4 विकेटी व्हगडावन 109 धांवड्यो करून जैत जोडलें.
नेपाळा वतीन सोमपाल कामी, दिपेंद्र सिंग अॅरी आनी अबिनाश बोहरा हांणी दरेकी एक विकेट घेतली. 20 धांवड्यो दिवन 3 विकेटी घेवपी टीम प्रिंगलाची मॅन ऑफ द मॅच पुरस्कारा खातीर निवड जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
