भांगरभूंय | प्रतिनिधी
भारतान संवसारीक टी-20 क्रिकेट सर्तींतले आपले पयले मॅचींत आयर्लेण्ड पंगडाक 8 विकेटींनी हारयलो. रोहीत शर्मान मुखेल्याक सोबा सारकी खेळी करतना 52 धांवड्यांची खेळी केली. पूण, दुखापतीक लागून ताका मैदान सोडचें पडलें. ताका लागून भारतीय क्रिकेट मोग्यांक हुस्को जालो.
आयर्लेण्डान दिल्ली 97 धांवड्यांची मोख भारतान 12.2 ओव्हरींनी 2 विकेटी व्हगडावन मेळयली.
रोहीत शर्माक पयले ओव्हरींत जीवनदान मेळ्ळें आनी हे खेळपट्टीचेर बॅटींग करप सोंपें ना हें भारताच्या बॅट्समनांक कळ्ळें. तिसरे ओव्हरींत मुखार येवन शॉर्ट मारपाच्या यत्नांत विराट कोहली (2) थर्ड मॅन वाठारांत कॅच बाद जालो. पूण, रोहीत शर्मान एक बाजू सांबाळून धरली. आयर्लेण्डाच्या बॉलरांक ताणें वेवस्थीत खेळून काडटना 35 बॉलांनी अर्द शेंकडो पुर्ण केलो. पूण, 10वे ओव्हरीच्या निमाण्या बॉलाचेर पूल शॉर्ट खेळपाच्या यत्नांत अॅडर हाणें घाल्लो बॉल रोहीताच्या उजव्या भुजाक आपटलो. रोहीताक खूब दुखलें आनी ताणें रिटायर्ड हर्ट जावपाचो निर्णय घेतलो. रोहीतान 37 बॉलांनी चार चवके आनी तीन सक्यांचे मजतीन 52 धांवड्यांचें योगदान दिलें आनी ऋषभ पंता वांगडा 44 बॉलांनी 54 धांवड्यो केल्यो.
जैता खातीर 6 धांवड्यांची गरज आसतना सुर्यकुमार यादव (2) व्हड शॉर्ट खेळपाच्या यत्नांत कॅच बाद जालो. ऋषभान 26 बॉलांनी तीन चवके आनी दोन सक्यांचे मजतीन नाबाद 36 धांवड्यो केल्यो आनी भारताक जैत मेळोवन दिलें.
ते आदीं चार फास्ट बॉलरांक खेळोवपाचो मुखेली रोहीत शर्माचो निर्णय येसस्वी थारलो. अर्शदीप सिंगान सुरवात करून दिली. मोहम्मद सिराज, जसप्रीत बुमरा हांणी अचूक टप्प्याचेर बॉलींग करून आयर्लेण्डाच्या बॅट्समनांक चेपणाखाला हाडले. हाचो फायदो हार्दीक पांड्यान घेतलो. ताणें तीन विकेटी घेवन टिकाकारांचें तोंड बंद केलें.
अर्शदीपान आपल्या पयल्या स्पेलांत 3 ओव्हरी घालून 18 धांवड्यो दिवन 2 विकेटी घेतल्यो. ताणें पॉल स्टर्लींग (2) आनी अॅण्डी बालबर्नी (5) हे जोडयेक 9 धांवड्यांचेर तंबूंत धाडली. दुसरे वटेन हार्दीक पांड्यान लोर्कन टकराक (10) बोल्ड करून आयर्लेण्डाक तिसरो धपको दिलो.
आयर्लेण्डाचे बॅट्समन गोंदळिल्ले, भियेल्ले भशेन दिसले. हे मजगतीं, जसप्रीत बुमरान उत्कृश्ट बावन्सराच्या नेटार प्रतिस्पर्धी पंगडाक आनीक एक धपको दिलो. ताणें हॅरी टेक्टराक (4) बाद केलो. हार्दीक आनी मोहम्मद सिराज हांणी उपरांत वळेरेन कर्टीस कॅम्फर (12) आनी जॉर्ज डॉक्रेल (3) हांकां बाद केले. हार्दीकान आपली तिसरी विकेट घेतना मार्क एडराक (3) तंबूंत धाडलो.
संवसारीक टी-20 क्रिकेट सर्तींत 12 वर्सांनी भारताच्या बॉलरांनी पयल्या 10 ओव्हरींनी 6 विकेटी घेतल्यो. 2021चे संवसारीक टी-20 सर्तींत इंग्लंडा आड 54 धांवड्यांचेर 6 विकेटी घेतिल्ल्यो.
मजगतीं, अक्षर पटेलान आपले पयले ओव्हरींत रिटर्न कॅच धरून बॅरी मॅककार्थीक (0) बाद केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
