भांगरभूंय | प्रतिनिधी
20 शाळांची पटसंख्या 20 परस उणी
भांगरभूंय | प्रतिनिधी
वाळपयः पोरूंचे तुळेंत सत्तरी म्हालांतल्या सरकारी मुळाव्या शाळांची परिस्थिती आयजूय बरी आसा. हाका लागून अंदूंची पटसंख्या वाडपाची शक्यताय भागशिक्षणधिकार्यान उक्तायल्या. म्हालांतल्या शाळांचो आंकडो पळयल्यार सरकारी मुळाव्या पांवड्यार शाळांचो आंकडो 101 आसा. तशेंच खाजगी शाळांचोय आंकडो व्हडा प्रमाणांत आसा.
फुडारांत गांवगिर्या वाठारांनी चलपी सरकारी मुळाव्या शाळां मुखार खूबशे तरेच्यो आडखळीं निर्माण जावपाची शक्यताय आसा. कारण सरकारान खाजगी शाळांनी खूबशे तरेच्यो सुविधा उपलब्ध केल्यात. गोंय मुक्ती उपरांत सत्तरी म्हालाच्या दरेका गांवांत मुळाव्यो शाळो उबारल्यो. ह्या सगळ्यो शाळो मराठी भाशेंतल्यान चलतात. उपरांत तेन्नाचे मुख्यमंत्री प्रतापसिंह राणे हांणी शिक्षण आनी रस्ते हाचेर विशेश भर दिवन ह्या शाळांक बरे तरेच्यो सुविधायो उपलब्ध करपाचेर विशेश भर दिलो.
सध्याची परिस्थिती पळयल्यार सत्तरी म्हालांतली सरकारी शाळांची पटसंख्या वाडपाक लागल्या. फाटल्या पांच वर्सांनी सरकारी मुळाव्या शाळांक बरे दीस येवपाक लागल्यात, अशें पळोवपाक मेळटा. आदल्या सरकारी मुळाव्या शाळांची अवस्था सामकी वायट जाल्या. आयज परिस्थिती सामकी बदल्ल्या. कारण गोंय सरकाराच्या शिक्षण खात्यान शिक्षणाची प्रणाली चालीक लावपाचेर भर दिला. पालक ह्या शाळांचे दिकेन वळपाक लागल्यात. सगळ्या शाळां मदल्या 20 शाळांची पटसंख्या 10 परस उणी आसा. तरीय ह्यो शाळो बंद जावच्यो नात, अशी खात्री शिक्षण खात्यान दिल्या. ताका लागून पालकांनी समाधान उक्तायलें.
मेळिल्ले म्हायती प्रमाण सगळ्या शाळांच्यो इमारती बर्यो आसात. खंयच्योच इमारती असुरक्षीत आशिल्ल्याचें स्पश्ट जावंक ना. सावर्डे पंचायत वाठारांतल्या बंदीरवाड्यार आशिल्ले सरकारी मुळावे शाळेचे इमारतीचें पांखें सारकें करपाची गरज आसा. हे विशींचो प्रस्ताव भौशीक बांदकाम खात्याला सादर केला. ताची बेगिनूच दुरुस्ती जातली, अशें भाग शिक्षण अधिकार्यांनी सांगलां. फाटल्या पांच वर्सां सावन खूबश्या इमारतींची दुरुस्ती केल्या. कांय इमारतींची दुरुस्ती फुडल्या वर्सा करपाची शक्यताय आसा. तशेंच भुरग्यां संबंदी खंयचेच इमारतींत असुरक्षितताय ना, अशें भाग शिक्षण अधिकार्यांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
