भांगरभूंय | प्रतिनिधी
मुख्यमंत्रीः प्रदुशीत उदक ‘एसटीपीं’त सोडल्यार कारवाय
भांगरभूंय । प्रतिनिधी
पणजी : ज्यो पंचायती योग्य तरेन कोयराचें वेवस्थापन करून नितळसाणीक हातभार लायता, त्या पंचायतींक चड निधी मेळटलो. नितळसाण राखपी पंचायतीं खातीर सरकार आलायत्या निधीची तजवीज करतलें. तशेंच जे उद्देग प्रदुशीत उदक एसटीपी प्रकल्पांत सोडटात, तांचेर खर कारवाय करपाची शिटकावणी मुख्यमंत्री डॉ. प्रमोद सावंत हांणी दिल्या.
संवसारीक पर्यावरण दिसा निमतान पणजे कार्यावळ जाली. हे कार्यावळींत मुख्यमंत्री डॉ. प्रमोद सावंत हे मुखेल सोयरे म्हूण उलयताले. पर्यावरण मंत्री आलेक्स सिक्वेरा, आयडीसीचे अध्यक्ष आलेक्स रेजिनाल्ड, प्रदुशण नियंत्रण मंडळाचे अध्यक्ष महेश पाटील आनी हेर मानेस्त हाजीर आशिल्ले. सध्या पर्यावरणाचे जतनाये खातीर सरकार पंचायतींक हरीत प्रमाणपत्र दिता. अंदूं ठाणे- डोंगुर्ली आनी मेणकुरे पंचायतीक हरीत प्रमाणपत्र फावो जालां. फुडल्या वर्सा सावन पर्यावरणाचे जतनाये खातीर शिक्षण संस्थांक लेगीत हरीत प्रमाणपत्र सरकार दितलें. कोयर वेवस्थापना खातीर सरकार कोट्यांनी रूपया खर्च करता. तरी लेगीत कांय लोक पोतयांनी कोयर भरून रस्त्याचे कुशीक उडयतात. लोकांनी कोयर रस्त्याचे कुशीक उडोवचो न्हय, असो उलो मुख्यमंत्री डॉ. सावंत हांणी ह्या वेळार मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
