भांगरभूंय | प्रतिनिधी
प्रदुशित उदक एसटीपी प्रकल्पात सोडल्यार उद्येगांचेर कारवाय
पणजी, प्रतिनिधीः ज्यो पंचायती योग्य तरेन कोयराचे वेवस्थापन करून नितळसाणीक हातभार लायतात, तांकां चड निधी मेळटलो. नितळसाण राखपी पंचायतीं खातीर सरकार आलायत्या निधीची तजवीज करतलो. तशेंच जे उद्येग प्रदुशित उदक एसटीपी प्रकल्पांत सोडटात, तांचेर खर कारवाय करपाची शिटकावणी मुख्यमंत्री डॉ. प्रमोद सावंत हांणी दिल्या.
संवसारीक पर्यावरण दिसा निमतान पणजेंत कार्यावळ जाली. हे कार्यावळींत डॉ. सावंत हे मुखेल सोयरे म्हूण उलयताले. पर्यावरण मंत्री अॅलेक्स सिक्वेरा, आयडीसीचे अध्यक्ष अलेक्स रेजिनाल्ड, प्रदुशण नियंत्रण मंडळाचे अध्यक्ष महेश पाटील आनी हेर मानेस्त हाजीर आशिल्ले.
सध्या पर्यावरणाच्या जतनाये खातीर सरकार पंचायतींक हरीत प्रमाणपत्र दिता. हे वर्सा ठाणे – डोंगुर्ले आनी मेणकुरें पंचायतीक हरीत प्रमाणपत्र फावो जाला. येत्या वर्सा सावन पर्यावरणाच्या जतनाये खातीर शिक्षण संस्थांक सुध्दा हरीत प्रमाणपत्र सरकार दितलो. कोयर वेवस्थापना खातीर सरकार कोट्यांनी रूपया खर्च करता. तरी सुध्दा काय लोक पोतयानी कोयर भरून रस्त्याच्या कुशीक उडयतात. लोकांनी कोयर रस्त्याच्या कुशीक उडोवचो न्हय असो उलो डॉ. सावंत हांणी हे वेळार मारलो.
एक लाख बांबूचीं रोपां दितले
राज्यांत न्हंयचे देगेर तशेंच दर्यादेगेर मातयेचो कटाव वाडत आसा. बांबू मातयेचो कटाव उणे करता. देखून आमी बांबू रोवपाची मोहीम हातांत घेवपाचे आसात. हाचे वरवीं फुडल्या चार म्हयन्यांत 1 लाख बांबूचीं झाडां वांटून दितलें अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
