भांगरभूंय | प्रतिनिधी
पणजी, बातमीदार ः उत्तर गोंयचे खासदार श्रीपाद नायक हांणी लोकसभा वेंचणुकेंत सेगीत सवे खेपे सुमार 1.16 लाख मतांच्या अंतरान जैत मेळोवन इतिहास रचलो. हाका लागून तांकां केंद्रांत कॅबिनेट मंत्रीपद मेळपाची शक्यताय आसा. नायक हांणी कितलींशींच वर्सां केंद्रांत राज्यमंत्री पदाचेर काम केलां. पूण हे खेपे केंद्रांत परतून एनडीए सरकार स्थापन जालें जाल्यार तांकां कॅबिनेट मंत्रीपदाची संद मेळपाची शक्यताय आसा.
श्रीपाद नायक हांणी 1999 वर्सा आदले केंद्रीय मंत्री अॅड. रमाकांत खलप हांकां हारोवन लोकसभेंत प्रवेश केल्लो. भाजपान 1996 वर्सा जाल्ले लोकसभा वेंचणुकेंत उत्तर गोंयांतल्यान आदले मुख्यमंत्री मनोहर पर्रीकार हांकां उमेदवारी दिल्ली. त्या वेळार काँग्रेसींतल्यान अमृत कासार आनी मागोच्या उमेदवारीचेर रमाकांत खलप उबे आशिल्ले.
वेंचणुकेंत खलप हांकां 92,348, अमृत कासार हांकां 81,803 आनी मनोहर पर्रीकार हांकां 36,022 मतां मेळिल्ली. ही वेंचणूक जिखल्या उपरांत खलप लोकसभेंत पावले आनी तांका केंद्रीय कायदो मंत्रीपदाचे पद मेळ्ळे. राज्यांतल्या जायत्या राजकीय घडामोडीं उपरांत खलप हांणी काँग्रेसींत प्रवेश केलो आनी 1999 वर्साचे वेंचणुकेंत काँग्रेसीची उमेदवारी जिखली. त्या वेळार भाजपा कडल्यान पयलेच खेपे लोकसभेच्या मळार प्रवेश केल्ल्या श्रीपाद नायक हांचे कडेन तांचो सामनो जालो. हे वेंचणुकेंत श्रीपाद नायक हांकां 1,04,958 मतां मेळ्ळीं, जाल्यार खलप हांकां 68,237 मतां मेळून व्हड प्रमाणांत 36,721 मतांनी हार खावची पडली. ते उपरांत काँग्रेसीन खलप हांकां केन्नाच उमेदवारी दिली ना.
1999 सावन आतां मेरेन जाल्ल्या सेगीत पांच लोकसभा वेंचणुकांनी उत्तर गोंयांत जिखपाक श्रीपाद नायक येसस्वी जाले. ह्या काळांत 2009 वर्सा फकत एका वेंचणुकेंत विरोधकांनी तांका खर झूज दिलें. हे वेंचणुकेंत उत्तर गोंयांतल्यान ते फकत 6,353 मतांनी जिखिल्ले. काँग्रेसीचे उमेदवार जितेंद्र देशप्रभून हांणी तांकां खर झूज दिल्लें. श्रीपाद नायक हांणी 2004 वर्सा काँग्रेसीचे विल्फ्रेड डिसोझा हांकां 56,213 मतांनी, 2014 वर्सा रवी नायक हांकां सुमार 1.05 लाखांनी आनी 2019 वर्साचे वेंचणुकेंत गिरीश चोडणकार हांणी 80,247 मतांनी हारोवन जैत मेळयल्लें. हे वेंचणुकेंत मात श्रीपाद नायक हांणी सोगीत सवे खेपे जैत मेळोवन मतांच्या नदरेन इतिहास रचलो. देखून जायतीं वर्सां राज्यमंत्री पद सांबाळपी नायक हांकां हे खेपे कॅबिनेट मंत्रीपदाची जापसालदारकी मेळपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
