भांगरभूंय | प्रतिनिधी
नवी दिल्ली, खबरां संस्था ः भारतांत दर दोन दादल्यां मदलो एक आनी धा बायलां मदली एक बायल धूम्रपानाच्या रुपांत तंबाखू वापरता अशें संवसारीक भलायकी संघटनेच्या आंकड्यां प्रमाण दिसून येता. धूम्रपान करपी लोकांक जायत्या दुयेंसांचो धोको आसूं येता. सध्या बायलां मदीं धूम्रपानाचे प्रमाण वाडत आसा. पिराय, समाजीक-आर्थीक स्थिती, मानसिकताय हाची फाटलीं कारणा आसूं शकता. अशा तंबाखूच्या पदार्थांचो वापर, खास करून धूम्रपान करप, बायलांचे भलायके खातीर खूब धोक्याचे थारता आनी तांकां धोको निर्माण जावंक शकता. धूम्रपान करपी बायलांक दादल्यां परस काळजाचे दुयेंस जावपाचो धोको चड आसता. धूम्रपानाक लागून स्वास घेवापाचे त्रासा सयत फुफ्फुस, स्तन, गर्भाशय आनी थ्रोम्बोइम्बोलिझम ह्या सारक्या वेगवेगळे प्रकारचे कॅन्सर जावंक शकतात.
किशोरावस्थेंत धूम्रपानाचे परिणाम
धूम्रपानाक लागून बायलांक अनियमित आनी वेदनादायक मासिक पाळी, स्वास घेवपाची समस्या, शारिरीक फिटनेस उणी जावप, चिडचिडेपण आनी मूड स्विंग्स जावप वा निरशेणी येवंक शकता.
धूम्रपानाचे प्रजनन क्षमतेचेर जावपी परिणाम
धूम्रपानाक लागून प्रजनन क्षमता उणी जाता. अंडाशयांतल्या तांतयांचो आंकडो उणो जाता, शुक्राणूक त्रास जाता आनी गुरवारपणाचे प्रमाण 30 टक्क्यांनी उणें जाता. इतलेंच न्हय तर तांतयांतल्या आनुवंशिक घटकांचेय लुकसाण जावंक शकता. ताका लागून गर्भपात जावपाचो धोको वाडूंक शकता.
गर्भांतल्या भुरग्याचेर धूम्रपानाचे परिणाम
भुरगें पोटांत आसतना आवयन धूम्रपान केल्यार भुरगें जल्माक आयल्या उपरांत अर्भकांक ‘सडन इन्फन्ट डेथ’ सिंड्रोम जावपाचो चड धोको आसता. तशेंच भुरग्याची वाड आनी उदरगतीत कळाव जावप, ब्रोन्कियल दमो, मोठसाण आनी काळीज आनी रगता संबंदीत दुयेंस जावपाची चड शक्यताय आसता.
मेनोपॉजचेर धूम्रपानाचे परिणाम
धूम्रपानाचो मेनोपॉजचेर परिणाम करपाक शकता, जशे की मासिक पाळी बेगीन बंद जावप, मासिक पाळींची खर लक्षणां आनी हाडांची भलायकी उणी जावप.
ह्या सगळ्या धोक्यांक टाळपाक वा उणे करपाक बायलांनी धूम्रपान सोडपाची गरज आसा. हाचे खातीर हे संबंदी बायलां मदीं जागृताय करप गरजेचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
