भांगरभूंय | प्रतिनिधी
नवी दिल्ली, खबरां संस्था: लोकसभा वेंचुकेचो निकाल लागलो. एनडीएक २९२ सुवातो, इंडिया आघाडीक २३४ सुवातांचेर जैत मेळ्ळें. १७ जाग्यांचेर हेर पक्षांच्या उमेदवारांक जैत मेळ्ळें. अजून कांय कडेन निकाल जाहीर जावपाचे आसात. महाराष्ट्रांत महाविकास आघाडेक ३१ तर महायुतीक १७ जाग्यांचेर जैत मेळ्ळें. ताका लागून आतां सत्तास्थापने खातीर हालचाली सुरु जाल्यात. आयज दिल्लींत बसका आसतली. चडशे फुडारी दिल्ली वचपाक भायर सरल्यात. उरिल्ले दनपरां वतले.
अजित पवार वतले?
लोकसभा वेंचणुके उपरांत आयज दिल्लींत एनडीएची सत्तास्थापने विशीं म्हत्वाची बसका जातली. हे बसकेक राष्ट्रवादी कॉंग्रेस पक्षाचे अध्यक्ष अजित पवार हे हाजीर रावतले काय ना हे विशीं दुबाव आसा. अजित पवार गटा कडल्यान पक्षाचे राष्ट्रीय कार्याध्यक्ष प्रफुल्ल पटेल हाजीर रावतले.
बीडचें राजकारण आपल्याक विचारले बगर जावचें ना
बीडांत शरद पवार गटाच्या बजरंग सोनावणे हांणी भाजपाची पेजाद उमेदवार पंकजा मुंडेंक हारयली. ‘‘म्हाका जैत मेळपाचें आशिल्लें म्हणून हांवें संयम बाळगिल्लो. मात, निमाणे मेरेन त्रास दिवपाचें काम विरोधकांनी केलें. बीडची जनता वांगडा आशिल्ल्यान जैत मेळ्ळें.बीडचें राजकारण आपल्याक विचारले बगर ह्यान फुडें जावचें ना.’ अशें म्हणीत बजरंग सोनवणे हांणी पंकजा मुंडे हांकां आव्हान दिलां.
भाजपाच्या फुडार्यांनी मजत केली’’
दक्षीण लोकसभा मतदारसंघाचे शरद पवार गटाचे उमेदवार निलेश लंके हांकां जैत मेळ्ळें. तांणी भाजपच्या सुजय विखे पाटील हांकां २९ हजार मतांनी हारयले. जैता उपरांत उलयतना तांणी ‘भाजपचे स्टेजीर उबे रावन म्हाका मजत करपी त्या सगळ्या अदृश्य शक्तीचेंय हें जैत’’ अशें म्हणलें.
उत्तर पश्चीम मुंबय निकालाक शिवसेना ठाकरे गट आव्हान दितलो
उत्तर पश्चिम मुंबय लोकसभा मतदारसंघाच्या निकालाक शिवसेना ठाकरे गट आव्हान दितलो अशी म्हायती सुत्रांनी दिली. ठाकरे गटाचे उमेदवार अमोल किर्तीकर हे निमाणे निकालांत आघाडीचेर आसतना फेर मतमेजणी जाली आनी हातूंत किर्तिकर हे ४८ मतांनी हारले. ह्या निकालांत घुस्पागोंदळ जाल्ल्याचो दुबाव ठाकरे गटान उक्तायला. ताका लागून ह्या निकालाक शिवसेना ठाकरे गट आव्हान दितलो. पक्षान हे विशीं कायदेशीर सल्लो घेतला. ठाकरे गट राष्ट्रपतींक पत्र धाडटलो, अशी म्हायती मेळ्ळ्या.
एनडीए आनी इंडिया आघाडी मदीं घडामोडी
एनडीए आनी इंडिया आघाडी मदल्या घडामोडींक वेग आयला. सत्ता स्थापनेची दिल्लींत मोर्चेबांधणी सुरु आसा. दिल्लींतले बसके खातीर दोगूय फुडारी नितीश कुमार, तेजस्वी यादव एकाच विमानान दिल्लीक वतले.
मोदी सरकारची आयज निमाणे कॅबिनेट बसका
मोदी सरकाराची आयज निमाणी कॅबिनेट बसका दिल्लीक जातली. हे बसकेंत १७ वी लोकसभा विसर्जीत करपाची शिफारस जातली. उपरांत नव्या सरकाराचो मार्ग मेकळो जातलो. उपरांत सरकाराच्या कामाचोय प्रस्ताव येवपाची शक्यताय आसा.
नितीन गडकरी दिल्लीक वतले
नागपूरच्यान वेंचून आयिल्ले नितीन गडकरी आयज दिल्लीक पावतले. गडकरी हांणी लोकसभा वेंचणुकेंत सेगीत जैत मेळोवपाचो इतिहास राखून दवरला.
दोन घटक पक्षांची कामगिरी
एनडीएच्या दोन घटक पक्षांची कामगिरी बरी जाल्या. आंध्र प्रदेशांत टिडीपी आनी बिहारांत नितीश कुमारांक बरें येस मेळ्ळां. बिहारांत जेडीयू १६ जाग्यांचेर लढल्या आनी तांतल्या पंदरा जाग्यांचेर येस मेळयलां. जाल्यार टीडीपीन १६ सुवातांचेर जैत मेळयलें. हे विशीं आंध्र प्रदेशांतली विधानसभा वेंचणुकेंत टीडीपीन १७५ विधानसभा सुवातां मदल्यो १३५ सुवातो जिंकल्यात. ताका लागून टीडीपी आनी जेडीयूच्या जैतान राष्ट्रीय पांवड्यार तांचें म्हत्व वाडयलां.
दिल्लींत इंडिया आघाडीचें २८ पक्षांक बसके खातीर आमंत्रण
आयज इंडिया आघाडीची दिल्लींत बसका आसा. कॉंग्रेस अध्यक्ष मल्लिकार्जुन खरगेंच्या घरा ही बसका जातली. इंडिया आघाडीन सगळ्या २८ पक्षांक बसके खातीर आमंत्रीत केलां. उद्धव ठाकरेय हे बसकेक हाजीर रावतले. शरद पवार आनी सुप्रिया सुळे हीय वतलीं. ताका लागून सरकार कोणाचें येतलें? सत्ता परिवर्तन जातलें काय नेतृत्व बदल जातलो? हे विशींची उत्सुकताय वाडल्या.
सत्ता स्थापनेच्या हालचालींक नेट
लोकसभा वेंचणुकेचो निकाल स्पश्ट जाला. एकट्या भाजपान बहुमत मेळोवंक ना, तांकां सत्ता स्थापन करपाक एनडीएच्या पक्षांचेर निंबून रावचें पडटलें. इंडिया आघाडीक २३४ सुवातो मेळ्ळ्यो. ताका लागून इंडिया आघाडीय देशांतलो हेर बारीक पक्ष आनी एनडीएच्या कांय पक्षांक आपले सयत घेवन सत्तास्थापनेचो दावो करपाक शकता. इंडिया आघाडींतल्या फुडार्यांनीय अशे तरेचे संकेत दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
