भांगरभूंय | प्रतिनिधी
-पक्षाक निकाल मान्य, देशांत मोदींच्या फुडारपणा खाला रालोआचें सरकार
पणजी: दक्षीण गोंयांत भाजप उमेदवार हारला, तरी लेगीत भारतीय जनता पक्षाक 45.26 टक्के मतां मेळ्ळ्यांत. प्रचाराक फुडारी आयले म्हूण सगलीं मतां तांच्या पक्षाक मेळटात, अशी स्थिती आसना. लोकसभा वेंचणुकेचो निकाल पक्षाक मान्य आसा. देशांत परतून नरेंद्र मोदींच्या फुडारपणा खाला राष्ट्रीय लोकशाय आघाडीचे सरकार येतले, अशें मुख्यमंत्री डॉ. प्रमोद सावंत हांणी म्हणलें.
लोकसभा वेंचणुके उपरांत भारतीय जनता पक्षान पणजेत पत्रकार परिशद घेतली. हे पत्रकार परिशदेक मुख्यमंत्री डॉ. प्रमोद सावंत, वेंचून आयिल्ले श्रीपाद नायक, प्रदेश अध्यक्ष सदानंद शेट तानावडे, भलायकी मंत्री विश्वजीत राणे आनी हेर आमदार हाजीर आशिल्ले.
लोकांनी जाे कौल दिला, ताे पक्षाक मान्य आसा. उत्तर गोंयांत पक्षाक 56 टक्के जाल्यार दक्षीण गोंयांत 45.26 टक्के मतां मेळ्ळीं. उत्तर गोंयांतल्या 16 मतदारसंघांनी पक्षाक आघाडी मेळ्ळी. दक्षीण गोंयांतल्या 11 मतदारसंघांत आघाडी मेळ्ळी. सावड्डें सारक्या मतदारसंघांत चड आघाडेची आस्त आशिल्ली. पूण तितली आघाडी मेळ्ळी ना. पक्ष निकालाचे विश्लेशण करतलो, अशें मुख्यमंत्री डॉ. प्रमोद सावंत हांणी सांगलें.
हे सरकार गडगडटले अशे तरेचीं सपनां कांय लोकांक पडपाक लागल्या. राज्यात डबल इंजीन सरकार उरतलेंच, अशें मुख्यमंत्री डॉ. प्रमोद सावंत हांणी म्हणलें.
—————-
जैत सगल्यांच्या यत्नाक लागून मेळ्ळा: श्रीपाद नायक
म्हजें जैत हे सगल्यांच्या यत्नांचे जैत आसा. पयलीं परस चड आघाडी मेळटली, असो विस्वास अापणाक आशिल्लो. कार्यकर्ते आनी फुडाऱ्यांनी हो विस्वास खरो थारायलो. पुराय राज्याचे उदरगती खातीर आपूण वावुरतलो. दक्षीण गोंयांत पक्षाचो खासदार नासलो तरी उदरगती कडेन कसलोच भेदभाव जावचो ना, अशें श्रीपाद नायक हांणी सांगलें.
—————–
गरीब लोकां खातीर वावर : विश्वजीत राणे
श्रीपाद नायक हांकां लोक विटल्यात. तांची आघाडी उणी जातली, अशी चर्चा जाताली. ही चर्चा चुकीची थारल्या. गरीब लोकां खातीर सरकारान वावर केल्ल्यान ही आघाडी मेळ्ळ्या. राज्यांतल्या गरीब लोकां खातीर सरकाराचो वावर सुरूच उरतलो, अशें भलायकी मंत्री विश्वजीत राणे हांणी सांगलें.
—————–
निकालाचे विश्लेशण जातले: तानावडे
लोकसभा वेंचणुकेच्या निकालाचे विश्लेशण जातलें. दक्षीण गोंयांत पक्ष खंय उणो पडलो, ताचो सोद घेतले. लोकांचो कौल पक्षाक मान्य आसा. सगळे फुडारी आनी कार्यकर्त्यांच्या वावराक लागून पक्षाक हे येस मेळ्ळा, अशें प्रदेश अध्यक्ष सदानंद शेट तानावडे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
