भांगरभूंय | प्रतिनिधी
सगळ्यांत चड लोकसभा वेंचणुको जिखपाचो मेळयलो भोवमान
पणजी, प्रतिनिधी : उत्तर गोंयचे भाजप उमेदवार श्रीपाद नायक हांणी अॅड. रमाकांत खलप हांचो पराभव करीत सेगीत सवे खेपो जैत मेळयलें. सवे खेपो जैत मेळयताना तांणी आदले खासदार एदुआर्द फालेरो हांचो सेगीत पाच खेपो जैताचो विक्रम मोडलो. गोंयांत तरी सगळ्यांत चड लोकसभा वेंचणुको जिखपाचो भोवमान आता श्रीपाद भाऊन मेळयला.
हांचे पयलीं एदुआर्द फालेरो हांणी दक्षीण गोयांत सेगीत पाच लोकसभा वेंचणुकांनी जैत मेळयल्लें. 1977, 1980, 1984, 1989 आनी 1991 ह्या वर्सा जाल्ल्यो लोकसभा वेंचणुको एदुआर्द फालेरो हांणी जिखल्यात. 1996 वर्सा युगोडेपाचे चर्चिल आलेमाव हांणी एदुआर्द फालेरो हांकां हारोवन इतिहास रचिल्लो. आतां उत्तर गोंयांत श्रीपाद नायक हांणी 1999, 2004, 2009, 2014, 2019 आनी 2024 अशें 6 खेपो जैत मेळयलां. सगळ्यांत पयलीं 1999 वर्सा तांणी काँग्रेसीचे अॅड. रमाकांत खलप, 2004 वर्सा राष्ट्रवादीचे डॉ. विल्फ्रेड डिसोझा, 2009 वर्सा राष्ट्रवादीचे जितेंद्र देशप्रभू, 2014 वर्सा काँग्रेसीचे रवी नायक, 2019 वर्सा काँग्रेसीचे गिरीश चोडणकार आनी आतां अॅड. रमाकांत खलप (काँग्रेस) हांचो पराभव केला.
भारतीय जनता पक्षाच्या देशांतल्या ज्येश्ठ खासदारां मदीं आतां श्रीपाद भाऊंचो आस्पाव जातलो.
एदुआर्द फालेरो हांणी जिखिल्ल्यो वेंचणुको
1977, 1980, 1984, 1989, 1991
श्रीपाद नायक हांणी जिखिल्ल्यो वेंचणुको
1999, 2004, 2009, 2014, 2019, 2024
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
