गोंयांत 2019 च्या निकालाचीच पुनरावृत्ती

भांगरभूंय | प्रतिनिधी

उत्तरेंत श्रीपाद भाऊ सवे खेपो जैतिवंत, दक्षिणेचो गड राखपाक काँग्रेसीक येस

कॅप्टन विरियातो फर्नांडीस दक्षिणेचे नवे खासदार

पणजी, प्रतिनिधीः पुराय देशात राष्ट्रीय लोकशाय आघाडीची जैता कडेन वाटचाल सुरू आसताना गोंयांत मात फाटल्या खेपेच्याच (2019) निकालाची पुनरावृत्ती जाल्या. उत्तरेत काँग्रेस उमेदवार अॅड. रमाकांत खलप हांचो पराभव करीत भारतीय जनता पक्षाचे उमेदवार श्रीपाद नायक हे सेगीत सवे खेपो जैतिवंत जाल्यात. दक्षीण गोयांत काँग्रेसीचे कॅप्टन विरियातो फर्नांडीस हांणी भाजपाची पल्लवी धेंपो हांचो पराभव करीत दक्षिणेचो गड राखलो.
फांटले लोकसभा वेंचणुकेंत (2019) उत्तर गोंयांत भाजपाचे श्रीपाद नायक जाल्यार दक्षीण गोंयांत काँग्रेसीचे फ्रान्सिस सार्दिन जैतिवंत जाल्ले. हे वेंचणुकेंतूय उत्तर गोंयचेर भाजपाचो जाल्यार दक्षीण गोंयचेर काँग्रेसीचो झेंडो हुबला.

श्रीपाद नायक हांणी काँग्रेसीचे अॅड. रमाकांत खलप हांचे परस 1 लाख 12 हजार चड मतां मेळोवन जैत मेळयलां. दक्षिणेंत काँग्रेसीचे विरियातो फर्नांडिस हांणी भाजपाचे पल्लवी धेंपो हांचे परस 15 हजार 545 मतां चड मेळोवन जैत मेळयलां. देशाच्या हेर राज्यां प्रमाण गोयांतूय सकाळीं 8 वरांचेर मतमेजणीक सुरवात जाल्ली. सरकारी तंत्रनिकेतन, आल्तिनो हांगा उत्तर गोंयची जाल्यार दामोदर म्हाविद्यालय, मडगांव हांगा दक्षीण गोंयची मतमेजणी जाली. मतमेजणीच्या सुरवे सावन उत्तरेत श्रीपाद नायक जाल्यार दक्षिणेत काँग्रेसीचे विरियातो फर्नांडिस मुखार आशिल्ले. दक्षीण गोंय मतदारसंघ हो भाजपा खातीर प्रतिष्ठेचो मतदारसंघ आशिल्लो. प्रधानमंत्री नरेंद्र मोदी हांची जाहीर सभा वास्को (दक्षीण गोंय) हांगा जाल्ली. तशेंच भाजपान पयलेच खेपो बायलाक उमेदवारी दिल्ली. अशें आसून लेगीत दक्षीण गोंयच्या मतदारांनी काँग्रेस पक्षाचेरूच विस्वास उक्तायला.