भांगरभूंय | प्रतिनिधी
संवसारीक टी-20 क्रिकेट सर्तीतली तिसरी आनी ब गटांतली पयली मॅच ओमान आनी नामिबिया हांचे मदीं जाली. मॅचींत धांवड्यो उण्यो आसल्यो. पूण, लडत उमळशीक वाडोवपी थारली. अखेरच्या बॉला मेरेन रंगिल्ले मॅचीचो निकाल लावपा खातीर सुपर ओव्हर खेळोवची पडली.
पयलीं बॅटींग करपी ओमानाचो डाव फकत 109चेर सोंपलो. उपरांत ह्या धांवड्यांची राखण करतना ओमानाच्या बॉलरांनी आपलो ठसो उमठयलो. अखेरेक मॅच बादाबाद उरली आनी सुपर ओव्हरींत नामिबियान 11 धांवड्यांनी जैत जोडलें.
सुपर ओव्हरींत नामिबियान पयलीं बॅटींग केली. ओमानाच्या बिलाल खानान बरी बॉलींग केली. हे म्हत्वाचे ओव्हरींत डॅव्हिड व्हिसेन चार बॉलांनी एक सको आनी एक चवको मारून 13 धांवड्यो केल्यो. मुखेली गेरहार्ड इरास्मसान दोन चवक्यांचे मजतीन आठ धांवड्यो केल्यो. नामिबियान सुपर ओव्हरींत 21 धांवड्यो करपाक येस मेळयलें. ताका लागून ओमानाक स बॉलांनी 22 धांवड्यो गरज आशिल्ली. मोखीचो फाटलाव करतना ओमानान पयल्या बॉलाचेर दोन धांवड्यो केल्यो.नामिबिया वतीन ओव्हर लेगीत व्हिसेनूच घाली. व्हिसेन दुसरो बॉल निर्धाव घालून ओमानाचेर चेपण हाडलें. तिसऱ्या बॉलाचेर नामिबियान एक विकेट मेळयली. अशे तरेन ओमानाक तीन बॉलांनी 20 धांवड्यांची गरज आशिल्ली. चवथ्या बॉलाचेर ओमानाच्या बॅट्समनान एक धांवडी घेतली.अखेरच्या दोन बॉलांचेर 19 धांवड्यांची गरज आसतना ओमानान एक धांवडी घेतली. आतां फकत औपचारिकताय उरिल्ली. कारण ओमानाक जैता खातीर एका बॉलान 20 धांवड्यांची गरज आशिल्ली. अखेरच्या बॉलाचेर ओमानाच्या बॅट्समनान सको मारलो खरो. पूण, ओमानाक जैत मेळोवन दिवपाक तो फावोसो नाशिल्लो. सुपर ओव्हरींत अश्टतासांचें प्रदर्शन करपी व्हिसेची मॅन ऑफ द मॅच पुरस्कारा खातीर निवड जाली.
ते पयलीं, टॉस जिखून नामिबियान ओमानाक पयलीं बॅटींग करपाचें आमंत्रण दिलें. सुरवाती सावन संघर्श करीत आशिल्ल्या ओमानाक निर्धारीत 20 ओव्हरी लेगीत खेळपाक जमूंक ना. ताचो डाव 19.4 ओव्हरींनी 109चेर सोंपलो.
जीशान मकसूद (22) आनी खालिल कैल (34) हांकां सोडले जाल्यार ओमानाच्या एकाय बॅट्मनाक 20 परस चड धांवड्यो करपाक जमूंक ना. नामिबिया वतीन रुबेन ट्रम्बेलमॅनान सगल्यांत चड चार विकेटी घेतल्यो. मोख ल्हान आशिल्ली. पूण, ओमानान खर प्रतिकार केलो.
110 धांवड्यांचो फाटलाव करतना नामिबियाक लेगीत सुरवातीक धपके बसले. ओपनर मायकल वॅन लिंगें हाका खातें लेगीत उगडपाक जमूंक ना. निकोलस डॅव्हिनान (24) डाव मुखार व्हेलो. तो बाद जाल्या उपरांत डान फ्रायलिंक (45) हाणें सादूरतायेन खेळ करून नामिबियाक जैता वटेन व्हेलो. पूण, अखेरचे ओव्हरींत पांच धांवड्यांची गरज आसतना नामिबियाक अपेस आयलें आनी मॅच बादाबाद उरली. नामिबियान निर्धारीत 20 ओव्हरींनी 6 विकेटी व्हगडावन 109 धांवड्यो केल्यो.
नामिबियाक निमाण्या चार बॉलांचेर पांच धांवड्यांची गरज आशिल्ली. तिसऱ्या बॉलाचेर जेन ग्रीन बाद जालो. ताका लागून तीन बॉलांनी 5 धांवड्यो अशें समीकरण जालें. चवथ्या बॉलाचेर एक धांवडी मेळिल्ल्यान डॅव्हिड व्हिसाक स्ट्रायक मेळ्ळो. आतां दोन बॉलांनी चार धांवड्यांची गरज आशिल्ली. पांचव्या बॉलाचेर दोन धांवड्यो काडपाक नामिबियाक येस आयलें. अखेरच्या बॉलाचेर दोन धांवड्यांची गरज आशिल्ली. बॉल मेडन पडिल्लो. पूण, विकेटकीपराचे चुकीक लागून नामिबियाक एक धांवडी काडून मॅच बरोबरींत सोंपयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
