भांगरभूंय | प्रतिनिधी
अठराव्या लोकसभेच्या वेंचणुकेची दोन म्हयन्यां सावन सुरू आशिल्ली प्रक्रिया काल मंगळारा जायत आशिल्ल्या मतमेजणेन एकदाची सोंपतली. केंद्रांत नवेंे सरकार प्रधानमंत्री नरेंद्र मोदी हांच्या फुडारपणा खाला राष्ट्रीय लोयकशाय आघाडीचें आसतलें वा फुडारपण नाशिल्लें ‘इंडी’ आघाडीक सरकार स्थापन करपाची संद मेळटली हाचें चित्र आयज सादारणपणान दनपार मेरेन स्पश्ट जातलें. आतां निकालाची वाट पळोवप इतलेंच काम आसून लेगीत ‘इंडी’ आघाडीच्या एका परस एक कशा फुडाऱ्यां कडल्यान वेंचणूक प्रक्रिया सुरू जायत सावन चालू आशिल्लो रडीचो डाव, निकाल कांय वरांचेर आयिल्लो आसतना सोंपना. आनी वट्ट चित्र पळयत जाल्यार निकाल जाहीर जाले उपरांतूय खूबसो काळ तो सोंपपाची चिन्नां दिसनात. लोकसभा वेंचणुकेंतल्या निमाण्या पांवड्याचें मतदान पुराय जाले उपरांत अपेक्षे प्रमाण खूबशा टीव्ही चॅनलां कडल्यान एक्झीट पोल प्रसारीत केले, आनी तातूंतल्यान मतदारांचो आशिल्लो कल खूबशा प्रमाणांत स्पश्ट जालो. पूण राहूल गांधी आसूं वा मल्लिकार्जून खरगे वा जयराम रमेश सावन अखिलेश यादव, केजरीवाल, ममता, तेजस्वी मेरेन सगल्यांकूच ताचें पसून पोटदुखीचो त्रास जावंक लागला. आनी तांणी आपलो रडीचो डाव चालूच दवरतना प्रधनामंत्री नरेंद्र मोदी, गृह मंत्री अमीत शाह पसून वेंचणूक आयोगाचेरूय नेटाचो हल्लो करीत वेंचणूक निकाल मॅनेज करपाचो यत्न जायत आशिल्ल्याचो आरोप करत थयथयाट केला. आतां एक्झीट पोट वा मतदारांचो कल चांचण्यांक लेगीत भियेवन वचपी फुडारी सत्तेर येत जाल्यार कितें घडूंक शकतलें हाचें चित्र दोळ्यां मुखार येवंक लागलां.
देशांतलीं खूबशीं राष्ट्रीय टीव्ही चॅनलां सातव्या आनी निमाण्या पांवड्या वेलें मतदान पुराय जातकच मतदारांचो कल हे वेंचणुकेंत नेमको कोणा वटेन आसा हाचो अदमास दिवपी चांचण्यो प्रसारीत केल्यो, आनी कितें सांगचें विरोधकांक त्यो सगल्यो चांचण्यो बोगस आशिल्ल्याचो साक्षात्कार जालो. एक्झीट पोल हो कितें ह्या वेळार पयलेच फावटी घेतला अशेंय काय न्हय. ते खातीर एक्झीट पोलांतल्या अदमासा कडेन आडनदर करप निकाला मेरेन रावपाक विरोधकांचें शाणेपण थारपाचें. पूण खंयचें कितें? निकाल एकतर्फी भारतीय जनता पक्षाचे वटेन वतलो असो कल चांचण्यांतल्यान जशें स्पश्ट जायत गेलें त्या प्रमाणांत विरोधकांचे जबरदस्तीन फुगिल्ल्या बोमाड्यांतलो वारो भयार पडूंक लागलो. प्रधानमंत्रीपदाची सपनां रंगयत सद्या मग्न आशिल्ले राहूल गांधी हांकां तर हें सगलेंे पचोवन घेवप अशक्यच आशिल्लें. तांणी एक घाव दोन तुकडे करीत प्रधानमंत्री मोदी हांचेर हल्लो चडयलो आनी हो मोदी मिडियाचो पोल आसून तो बनावट आशिल्ल्याचें सांगलें.
आमच्या सर्वेक्षणा प्रमाण इंडी आघाडीक उण्यांत उणे 295 सुवातो मेळटल्यो असो दावोय तांणी केला. आतां एक्झीट पोलाचेर वास्तवीक अशी प्रतिक्रिया दिवप हातूंतच राहूल गांधी आनी तांचे वांगडी कितले थतर वितर जाल्यात हाचो प्रत्यय रोखडोच दिसून आयलो. काँग्रेसीचे राष्ट्रीय अध्यक्ष मल्लिकार्जून खर्गे, जयराम रमेश, तृणमूलच्यो ममता, सपाचे अखिलेश जाल्यार आपाचे केजरीवाल हांणी लेगीत तीच ‘री’ ओडीत एक्झीट पोल हो फर्जी कसो हें पटोवन दिवपाचो यत्न करीत रावले. फाटलीं धा वर्सां सत्ते पसून पयस आशिल्ल्या काँग्रेस आनी हेर घटक पक्षांच्या फुडऱ्यांक ह्या वेळारूय आमी सत्तेचे लागीं पसून पावंक शकत नाशिल्ल्याचें कल चांचण्यांतल्यान कळून आयलां. त्या वेळार मात तांच्या पांया सकयली माती व्हांवून गेली आनी मोदी आड हल्लाबोल सुरू जालो. सगल्याच एक्झीट पोलांनी इंडी आघाडीक 185 परस चड सुवातो मेळच्यो नात असो स्पश्ट अदमास दाखयिल्ल्यान विरोधकांक तो स्विकारप वा प्रत्यक्ष निकाला मेरेन रावप कठीण जालां. हें सगलें निकाल मॅनेज करपा खातीर घडोवन हाडलां असो आरोप करपाकूय कोणूच फाटी रावले नात. वेंचणूक प्रक्रिया सुरू जायत सावन ईव्हीएम आनी हेर कांय गजालीं वेल्यान विरोधकांचो रडीचो डाव सुरूच आशिल्लो. तातूंत प्रतिकूल एक्झीट पोलाची भर पडली. मागीर तोच डाव नेटान मुखार करून दवरपा बगर विरोधकां कडेन आनीक पर्याय नाशिल्लो. ताकाच लागून प्रत्यक्ष मतमेजणी कांय वरांचेर पाविल्ली आसून लेगीत वेगळेवेगळे मुद्दे उपस्थीत करून विरोधकांनी आतां हो रडीचो डाव वेंचणूक आयोगा मेरेन पावयला. पोस्टल मतांची मेजणी आदीं प्रमाण सुरवातेकूच जावची ही नवी मागणी तांणी मुखार दवरल्या. वेंचणूक आयोगान निमाणें आपलो निर्णय जाहीर केल्लो आसलो तरी वेंचणुकेंतल्या संभाव्य अपेसाचे खापर ईव्हीएम आनी वेंचणूक आयोगाचेर फोडपा खातीर सगले विरोधक एकठांय जावंक लागल्यात हें आतां स्पश्टपणान दिसूंक लागलां.
एक्झीट पोलांत जाहीर जाल्ल्या अदमासा प्रमाण सगले कितें घडत वचत जाल्यार केंद्रांत नरेंद्र मोदी हांणी तिसरे फावटी प्रधानमंत्री म्हूण सोपूत घेतले उपरांतूय खूबसो काळ हो रडीचो डाव सुरूच उरतलो हातूंत दुबाव ना. एक्झीट पोलांतल्यान हेंवूय स्पश्ट जालां की महारष्ट्रा सयत एक दोन राज्यांत भाजपाक कांय सुवातो व्हगडावच्यो पडटल्यो पूण ताची भरपाय अस्तंत बंगाल, ओडिसा, आंध्र प्रदेश, तेलगंणा ह्या राज्यांनी भरपाक करतले अशें चांचण्यो सांगतात. ताका लागून भाजपाची अबकी बार चारसो पार हो नारो सामको खरो थारपाचो नासलो तरी राष्ट्रीय लोकशाय आघाडी पावणे चारशे मेरेन धडक मारतली असो राजकी निरिक्षकांचो अदमास आसा. भाजप फुडाऱ्यांची सद्याची देहबोली पळयत जाल्यार प्रधानमंत्री नरेंद्र मोदी हे तिसरे फावटी केंद्रांत भोवमताचे सरकार स्थापन करून पंडीत जवाहरलाल नेहरू हांच्या विक्रमा कडेन बरोबरी करतले हातूंत तांकां खात्री आसून मोदी हांच्या हॅट्रीकेच्या जैताची तयारी दिल्ली आनी देशांत जावंक लागल्या.
विरोधक अजून लेगीत 295 सुवातो जिखतले असो दावो करीत आसले तरी ताका कसलोच आदार ना. समाजमाध्यमां वेल्यान दिसपी तेंको आनी जमनी वेली प्रत्यक्ष हकीकत हातूंत खूब फरक आसता. पूण काँग्रेस आनी हेर विरोधी पक्ष फुडाऱ्यांक ताची जाणीव अजून जाल्ली दिसना. ते खातीर आतां फक्त पांच ते स वरां तांकां रावचें पडटलें. रडीचो डाव मुखार चालूच दवरपा खातीर विरोधकांक अजून कांय विशय निश्चीतपणान मेळूंक शकतले. फुडलीं पांच वर्सां हो रडीचो डाव खेळपाची तांकां मनाची तयारी दवरची पडटली अशेंच एक्झीट पोलाचे आंकडे सांगतात.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
