भांगरभूंय | प्रतिनिधी
फोंडें, प्रतिनिधी: फोंडें येरादारी पुलिसांनी सोर्याचे घुंवळेंत वाहनां चलोवप्यां आड तीन दीस खर कारवाय करून वट्ट 21 चालकां आड कारवाय केली. 31 मे ते 2 जून अशेे तीन दीस खासा मोहीम राबोवन कारवाय केली. इतले मजगतीं एका चालकाक दोन दीस न्यायालयीन बंदखण तशेंच 5 हजार रुपयांचो दंड भरपाचो आदेश दिला. वाडपी अपघातांक लागून, फोंडें म्हालांतल्यो मॉडिफायड केल्ल्यो दुचाकी चलोवप्यां आड खासा मोहीम सुरू केल्या. फोंडें येरादारी पुलिसांनी खासा मोहिमे खाला तीन दिसां भितर वट्ट 21 जाणांक सोरो पियेवन गाडी चलोवप्यां आड कारवाय करून गुन्यांव नोंद केले. हाचेर रोखडीच न्यायालयांत सुनावणी जातली.
येरादारी पुलिसांनी 2023 वर्साच्या जानेवारी ते मे मेरेनच्या काळांत वट्ट 54 जाणां आड सोरो पियेवन गाडी चलयिल्ले खातीर गुन्यांव नोंद केल्यात. फोंडें येरादारी पुलीस स्टेशनाचे शिमेंत व्हड प्रमाणांत तरणाटे मॉडिफायड केल्ल्यो दुचाकी घेवन भोंवतात. ह्या दुचाकीं वरवीं लोकांक त्रास जावपाच्यो कागाळी आयल्यात. हाची दखल येरादारी पुलिसांनी घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
