भांगरभूंय | प्रतिनिधी
इकरावेक पयली भशेन शाखांच्याच आदारान दिला प्रवेश
पणजी, प्रतिनिधी : लोकसभा निकालाक लागून शाळा दोन दिस फुडें धुकलपाची मागणी अमान्य जाल्ल्यान शाळा/ विद्यालयां फाल्या 4 जून सावन सुरू जातली. सुटये उपरांत बऱ्याच म्हयन्यांनी विद्यालयांनी परतून विद्यार्थ्यांच्या किलबिलाटाक सुरवात जातली. इकरावेचे वर्ग सुद्दा फाल्यां सावन सुरू जातले.
अंदु णवव्या यत्तेक राष्ट्रीय शिक्षण धोरणाची (एनईपी) कार्यवाय जातली. हाका लागून णववेच्या विद्यार्थ्यां मदीं घुस्पागोंधळाची स्थिती आसा. हेर विद्यार्थ्यांचो अभ्यासक्रम पयलीं भशेन आसतलो.
सोमारा सगळ्या बाजारांनी चोपड्यो, पुस्तकां, रेनकोट, पेनां हे सामान घेवपा खातीर गर्दी आशिल्ली. दर वर्सा प्रवेशाक लागून इकरावेचे वर्ग उसरा सुरू जाता. अंदु धावेचो निकाल बेगीन जाला. चडशा उच्च माध्यमिक विद्यालयांनी इकरावेची प्रवेश प्रक्रीया पुराय जाल्ल्यान फाल्या सावन हेर वर्गां सयत इकरावेचे वर्ग सुद्दा सुरू जातलें. उच्च माध्यमिक विद्यालयांनी इकरावेक पयली भशेन कला, वाणीज्य, विज्ञान अशें शाखे प्रमाण प्रवेश दिल्या, अशी म्हायती प्राचार्य मंचाचे अध्यक्ष उमेश नायक हांणी दिली. बारावेच्या गुणपत्रिकेंत शाखेचो उल्लेख आसचो ना. विशय आनी गुणांचोच उल्लेख शालान्त मंडळाच्या गुणपत्रिकेत आसतलो. हाका लागून शाखे प्रमाण प्रवेश दिवपाक कसलीच आडखळ ना, अशें तांणी सांगलें.
णववेक अंदु एनईपीची कार्यवाय जातली. वेळापत्रक तशेच वेळो थारापाची मेकळीक विद्यालयांक आसली तरी त्यो कशो थारावच्यो, हे विशी विद्यालयांनी घुस्पागोंधळाची स्थिती आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
