भांगरभूंय | प्रतिनिधी
पणजी, प्रतिनिधी : एक्झीट पोलाच्या अदमासा प्रमाण भाजपा प्रणीत राष्ट्रीय लोकशाय आघाडेक (एनडीए) पुराय देशांत ४०० जागे निश्चितपणान मेळटले. ह्या ४०० जाग्यां मदीं गोंयांतल्या दोनूय जाग्यांचो आसपाव आसतलो, असो विस्वास मुख्यमंत्री डॉ. प्रमोद सावंत हांणी उक्तायला.
लोकसभा वेंचणुकेची मतमेजणी फाल्यां मंगळारा ४ जुनाक जातली. मतमेजणीची तयारी वेंचणूक आयोगा कडल्यान सुरू आसतनाच एक्झिट पोलाचेर राजकी पक्षांमदी नेटाची चर्चा सुरू आसा.
अब की बार ४०० पार, ही घोशणा दीत भाजपान पुराय देशांत प्रचाराची मोहीम राबयल्ली. ही घोशणा फाल्यां निश्चितपणान खरी थारतली. एक्झिट पोलान दक्षीण गोंयचो जागो राष्ट्रीय लोकशाय आघाडेक दिवंक ना. एक्झिट पोल हो अदमास आसता. दक्षीण गोंय मतदारसंघांत २५ हजारांच्या मताधिक्यान भाजपाचो उमेदवार जिखतलो, अशें डॉ. सावंत हांणी म्हणलां.
चडशा एक्झिट पोलांनी रालोआक ३५० वेर जागे दाखयल्ल्यान कॉंग्रेसीन एक्झिट पोल न्हयकारल्या. एक्झिट पोलाचो अदमास न्हयकारून कॉंग्रेसीन आपली हार मान्य केल्या, अशें डॉ. सावंत हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
