भांगरभूंय | प्रतिनिधी
फोंडें, प्रतिनिधी: सपना पार्क – कुट्टे हांगा सोमारा सकाळीं शट डावनच्या काळांत दुरुस्तीचें काम करतना लायटीच्या खांब्यार चडिल्लो सिद्धेश आनंद नायक (३२, बांदोड्यां) हाका लायटीचो शॉक लागून जखमी जालो. कांय दिसां पयलीं सिद्धेश नोकरेंत हॅल्पर म्हणून रुजू जाल्लो. जखमीक चड उपचारा खातीर गोमॅकोंत दाखल केला. लायटीच्या खांब्यार आशिल्लो लाईनमन क्रुज कुलासो हांणी प्रसंग वळखून हॅल्परच्या हातांत आशिल्ली सरी काडून कुशीक उडयल्ल्यान व्हड दुर्घटना टळ्ळी. हातूंत लायनमन क्रुज कुलासो होय जखमी जाला.
सपना पार्क, सपना टावन, प्रभुनगर आनी हेर वाठारांनी जमनी पोंदच्या लायटीच्या सरयांक जोडणी करपा खातीर सोमारा सकाळीं वीज खात्यान शट डावन जाहीर केल्लें. ताका लागून सकाळीं ९ वरांचेर ह्या वाठारांत शटडावन करून खात्याचे कर्मचारी काम करताले. उपरांत सुमार ९.४५ वरांचेर एका जमनी पोंदच्या लायटीच्या ट्रान्सफॉर्मराक सरयांची जोडणी करपा खातीर लायनमन क्रुज कुलासो आनी हेर एकलो लायटीच्या खांब्यार चडले. दोन सरयो तोडल्या उपरांत तिसरी सरी तोडपा खातीर यत्न करतना हॅल्पर सिद्धेश नायक हांणी खांब्यार चडून सरी हातांत घेतली. तेन्ना ताका लायटीचो शॉक लागलो. सिद्धेशाक लायटीचो शॉक लागिल्ल्याचें कळटांच खांब्यार आशिल्लो लायनमन क्रुज कुलासो हांणी कटराचे मजतीन लायटीच्यो सरयो कुशीक केल्यो. उपरांत सिद्धेश नायक जमनीर कोसळ्ळो. उपरांत क्रुज कुलासो हांणीय जमनीर उडी मारली.
जखमी जाल्ले सिद्धेश नायक हाका रोखडोच १०८ ऍम्बुलन्सींत व्हरून उपजिल्हो हॉस्पिटलांत दाखल केलो. उपरांत चड उपचारा खातीर गोमॅकोंत धाडलो. जाल्यार जखमी जाल्ल्या क्रुज कुलासो हांचे उपजिल्हो हॉस्पिटलांत उपचार केले. घडणुकेची म्हायती मेळ्ळ्या उपरांत वीज खात्याचे सहाय्यक अभियंते केशव गावडे हे रोखडेच उपजिल्हो हॉस्पिटलांत पावले. उपरांत घडणुके सुवातेर वचून पळोवणी केली.
सोमारा सकाळीं घडिल्ले हे घडणुकेची चड म्हायती दितना, शट डावन आसतना वीज प्रवाह सुरु उरिल्ल्याचें समजलें. हे विशीं चवकशी करता. सगळी जनताय घेवन काम करतना ही घडणूक घडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
