भांगरभूंय | प्रतिनिधी
नागरिकांक राष्ट्रीय महामार्गा वयल्यान प्रवास करप पडटलें म्हारग
नवी दिल्ली, खबरां संस्था: भारतीय राष्ट्रीय महामार्ग प्राधिकरणान (NHAI) आयच्यान टोल दरांत पांच टक्क्यां मेरेन वाड करपाचो निर्णय घेतला. लोकसभा वेंचणुकेचें सात टप्प्यांतलें मतदान पुराय जातांच आतां नागरिकांक राष्ट्रीय महामार्गा वयल्यान प्रवास करप म्हारग पडटलें. २ जूनच्या रातच्यान देशांतल्या सगळ्या महामार्गा वयल्या टोल दरांत वाड जाली.
एनएचएआयच्या अधिकार्यांनी सांगिल्ले प्रमाण, टोल दरांत दर वर्सा वाढ करतात. हा दर वर्साच्या प्रक्रियेचो एक भाग. ही दरवाड पयलींच जावपाची, मात आचारसंहितेच्या काळांत टोल दरांत वाड करची न्हय अशे निर्देश वेंचणूक आयोगान दिल्ले. हाका लागून टोल दर वाड वेंचणूक काळांत आडायल्ली. आतां ३ जून २०२४ सावन टोलच्या दरांत ३ ते ५ टक्क्यां मेरेनची वाड जाता. सोमार सावन देशभरांतल्या १,१०० टोल प्लाझाचेर टोल दरवाड जातली.
दूद दरांतूय वाड
मजगतीं, वेंचणुकेचो निकाल जाहीर जावचे पयलींच नागरिकांक म्हारगायेचो फटको बसला. गुजरात कॉर्पोरेटिव्ह मिल्क मार्केटिंग फेडरेशनान (जीसीएमएमएफ) अमुल आनी मदर डेअरीच्या दुदाचे कमितींत एक लिटर दुदाचे पोतये फाटल्यान दोन रुपयांनी वाड केल्या. दुदाची वाडिल्ली किंमत आयच्यान (सोमार, ३ जून) लागू जाल्या. जीसीएमएमएफान केल्ल्या घोशणे प्रमाण अमुल दूद दोन रुपयांनी म्हारग जालें.
अमुलान जाहीर केल्ले नवे किंमतीं प्रमाण ‘अमुल गोल्ड’च्या अर्द्या लिटराची पोती आतां ३२ न्हय तर ३३ रुपयांनी मेळटली. म्हळ्यार गिरायकांक अमुल गोल्डच्या एक लीटर पोतये खातीर आतां ६४ रुपयांच्या जाग्यार ६६ रुपया खर्च करचे पडटले. ‘अमुल ताजा’ खातीर (अर्द लीटर) २६ जाग्यार २८ रुपया, ‘अमुल शक्ती’ खातीर (अर्द लिटर) २९ जाग्यार ३० रुपया मेजचे पडटले. दुदाचे वाडिल्ले किंमतीक लागून सामान्य नागरिकांक व्हड धक्को बसला.
मदर डेअरी दुदाचें दर
बल्क व्हेंडेड मिल्क ५२ रुपया लिटरा बदला ५४ रुपया लिटर मेळटलें.
टोन्ड दूद ५४ रुपया लिटरा बदला ५६ रुपयांनी मेळटलें.
मदर डेअरी गायीचें दूद ५६ रुपया लिटरा बदला आतां ५८ रुपयां लिटर जातलें.
मदर डेअरी फूल क्रीम दूद ६६ बदला ६८ रुपयांनी लिटर मेळटलें.
मदर डेअरी म्हशीचें दूद ७० बदला आतां मेळटलें ७२ रुपया लिटर. डबल टोन्ड दूद ४८ रुपया लिटरा बदला ५० रुपय लिटर अशी दर वाडला. दिल्ली एनसीआरांत हो दर वाडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
