भांगरभूंय | प्रतिनिधी
पिपोडी, खबरां संस्था: मध्य प्रदेशच्या राजगड जिल्ह्याच्या पिपोडी हांगा आयतारा रातचो भिरांकूळ अपघात जालो. ट्रॅक्टर ट्रॉली उमथल्ल्यान १३ प्रवाशांक मरण आयलें. हातूंत चार भुरग्यांचोय आसपाव आसा. जाल्यार १५ जाण जखमी जाले. अपघातांत मरण आयिल्ले प्रवाशी राजस्थानाच्या मोतीपुरा गांवांतले. हे सगळे राजगडच्या कलमपूर हांगा एका लग्नाक येतना हो अपघात घडलो.
राजगडचे जिल्होधिकारी हर्ष दीक्षित हांणी, १३ जखमी प्रवाशांक जिल्हो हॉस्पिटलांत उपचारा खातीर दाखल केल्यात. दोगांचे तकलेक आनी छातयेक बरोच मार लागिल्ल्यान तांकां भोपाळच्या हमिदीया हॉस्पिटलांत दाखल केल्यात. दोग जाणांची परिस्थिती हुस्न्याची आशिल्ल्यान मरण आयिल्ल्यांचो आंकडो वाडपाची शक्यताय तांणी उक्तायली.
अपघाताची म्हायती मेळटांच जिल्होधिकार्या सयत पुलीस अधिक्षक आनी हेर वरिश्ठ अधिकारी घडणुके सुवातेर दाखल जाले. राजगड जिल्हो प्रशासकीय कार्यालया पसून ३० किमी अंतराचेर हो अपघात घडलो. राजस्थानांतल्यान ४० ते ५० जाणां मध्य प्रदेशांत लग्नाक येतालीं. ट्रॅक्टर ट्रॉलीच्या चालकाचें नियंत्रण सुटिल्ल्यान ती पिपोडी गांवां लागसारा उमथली.
अपघातांत जखमी जाल्ल्या एका प्रवाशान सांगलें, ट्रॅक्टर ट्रॉलीचो चालक सोरो पियेल्लो. तशेंच तांकी परस चड लोक ट्रॉलींत बसयल्ले. ट्रॅक्टर ट्रॉली उमथल्या उपरांत खुबशे लोक ताचे पोंदाक चिड्डले. रातचें उसरां जेसीबीचे मजतीन ट्रॅक्टर ट्रॉली उखल्ल्या उपरांत जखमींची सुटका जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
