दिव्यांगां खातीर गोंयच्या चक्रीवादळ आलाशिरो केंद्रांनी कसल्योच सुविधा नात

भांगरभूंय | प्रतिनिधी

गोंय दिव्यांग हक्क संघटणाः अधिकाऱ्यांक जापसालदार धरून तांचेर सरकारान कारवाय करपाची मागणी

भांगरभूंय । प्रतिनिधी

पणजीः गोंयांत बांदिल्ल्या नव्या चक्रीवादळ आलाशिरो केंद्रांत दिव्यांगां खातीर प्रवेश करपाक सुविधा ना. ते खातीर हें दिव्यांग हक्काचें उल्लंधन आसा. हे खातीर सरकारान अधिकाऱ्यांक जापसालदार धरून तांचेर कारवाय करपाची गरज आसा, अशें गोंय दिव्यांग हक्क संघटणेन (ड्रेग) मागलां.

हालींच राज्य आपत्ती निवारण प्राधिकरणान आपत्ती वेवस्थापनांची बसका आपयिल्ली. पूण हे बसकेंत दिव्यांग लोकांचो विचार जावंक ना. हें दिव्यांग हक्क कायदो कलम 8 चें उल्लंघन आसा. ह्या कायद्या खाला सगळ्या सरकारी इमारतींनी भितर सरपा खातीर दिव्यांगांक सुविधा आसप सरकारांक सक्तीचें आसा. पूण आमकां मेळिल्ले म्हायती प्रमाण उत्तर गोंयच्या दरेका म्हालांतल्या चक्रीवादळ आलाशिरो केंद्रांत दिव्यांगा खातीर कसलीच सुविधा ना, असो आरोप ड्रेगाचे अध्यक्ष आवेलिनो डिसा हांणी केला. तशेंच पंचायत घरांनी दिव्यांगां खातीर भितर सरपाक कसलीच सुविधा बांदूंक ना. रेईश मागूस, गोवा वेल्हा आनी शिवोली पंचायतीन बांदिल्ले नवे इमारतींत कसलीच सुविधा ना. ही गजाल लेगीत दिव्यांग हक्कांचें उल्लंघन आसा, अशेंय डिसा हांणी सांगलें.

जे सरकारी अधिकारी हे इमारतीच्या आराखड्यांक मंजुरी दिवन तांकां पेमेंट करतात, तांकां जापसालदार धरपाक जाय. ते खातीर दिव्यांग हक्काचें उल्लंघन करून नव्या बांदिल्ल्या सरकारी इमारतींनी भितर सरपा खातीर सुविधा कित्याक दिवंक ना, हाची चवकशी जावपाची गरज आसा. हे विशीं आमी राज्य दिव्यांग आयोग, मुख्य सचीव आनी मुख्यमंत्र्याक बरयलां, अशें डिसा हांणी सांगलें. संजय स्कूल वेवसायीक केंद्र अजून मेरेन उक्तें जावंक नाशिल्ल्यान हातूंत लक्ष घालचेंस अशें पत्र आमी राज्यपालांक बरयलां. ही इमारत सुरक्षीत ना, म्हूण बंद दवरिल्ली. आतां नवें शिक्षणीक वर्स फुडल्या सप्तकांत सुरू जाता. फाटले 8 ते 9 म्हयने हें केंद्रबंद आसा. ताका लागून भुरगीं घरा आसात. तांचे भलायकेचेर आनी मानसिकतेचेर परिणाम जाला, अशें डिसा हांणी सांगलें. जीं स्कुलां दिव्यांगां खातीर प्रवेश दिनात तांचें अनुदान रद्द करपाच्या गोंय दिव्यांग हक्क आयोगाच्या निर्णयाक ड्रेगान येवकार दिला.