भांगरभूंय | प्रतिनिधी
फोंडें, प्रतिनिधी: शापूर -बांदोडेंच्या अली मुर्तूजा नदाफ (३३) हांची कूड आयतारा सकाळीं दुर्भाटचे न्हंयेंत सांपडली. शेनवारा सकाळ सावन अली नदाफ हो बेपत्ता जाल्ल्याची कागाळ फोंडें पुलीस स्टेशनाचेर नोंद जाल्ली. फोंडें उजो पालोवपी दळाच्या जवानांनी उदकांतल्यान ताची कूड भायर काडली. उपरांत पुलिसांनी ती पोस्टमार्टमा खातीर धाडली.
पुलिसांनी दिल्ले म्हायती प्रमाण, शेनवारा सकाळीं अली नदाफ हो तरणाटो घरांतल्यान भायर सरिल्लो. सांजे वेळार घरा येवंक नाशिल्ल्यान ताचो सोद घेवपाक सुरवात केली. नदाफ आयतारा सकाळ मेरेन येवंक नाशिल्ल्यान फोंडें पुलीस स्टेशनांत बेपत्ता जाल्ल्याची कागाळ दाखल केल्ली. उपरांत कांय वेळान दुर्भाटा जुवारी न्हंयेंत एक कूड उदकांत उफेंता अशी म्हायती पुलिसांक मेळ्ळी. फोंडें उजो पालोवपी दळाच्या जवानांनी घडणुके सुवातेर वचून कूड उदकांतल्यान भायर काडली. मरण आयिल्ल्या अली नदाफ हांणी न्हंयेंत उडकी मारून आत्महत्त्या केल्ल्याचो दुबाव पुलिसांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
