भांगरभूंय | प्रतिनिधी
फोंडें, प्रतिनिधी: कसमशेळ- बेतोड्यां शेनवारा रातीं एका बंद घरा लागसारा आशिल्ले टाकयेंत मरण आयिल्लो गवो मेळ्ळो. फोंडें उजो पालोवपी दळाच्या जवानांनी मरण आयिल्ल्या गव्याक भायर काडले उपरांत रान अधिकार्यांनी घडणुकेचो पंचनामो केलो. फाटल्या स म्हयन्यांनी त्या उदकाचे टाकयेंत पडून दोन गव्यांक मरण आयलां.
मेळिल्ले म्हायती प्रमाण, फाटल्या कांय म्हयन्यां सावन बंद आशिल्ल्या घरा लागसारा उदक भरून उरिल्ले टाकयेंत एक गवो मेल्ले अवस्थेंत सांपडलो. हेच टाकयेंत स म्हयन्यां पयलीं एका गव्याक पडून मरण आयिल्लें. बंद आशिल्ल्या घरा कुशीक रान आशिल्ल्यान हांगा रानवटी जनावरां येतात. उदकाच्या सोदांत येवपी हीं जनावरां चुकून टाकयेंत पडटात, असो अदमास थळावे उक्तायतात.
शेनवारा रातीं उसरां फोंडें उजो पालोवपी दळाच्या जवानांक म्हायती दिले उपरांत तांणी मरण आयिल्ल्या गव्याक भायर काडलो. उपरांत रान अधिकार्यांनी येवन घडणुकेचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
