भांगरभूंय | प्रतिनिधी
आयच्यान संवसारीक टी-20 क्रिकेट सर्तीक सुरवात जाता. उक्तावणाची मॅच अमेरिका आनी कॅनडा ह्या पंगडां मदीं जातली. कॅनडान सरावाचे मॅचींत नेपाळ पंगडाक 63 धांवड्यांनी हारयला. जाल्यार नॅदरलॅण्डा आडची मॅच पावसाक लागून रद्द करची पडिल्ली. दुसरे वटेन अमेरिकेच्यो दोनूय मॅची पावसाक लागून रद्द करच्यो पडल्यात. ताका लागून अमेरिकेक सराव करपाची योग्य अशी संद मेळूंक ना. पूण, अमेरिकेन फाटल्या म्हयन्यांत बांगलादेशा आडची तीन मॅचींची टी-20 माळ 2-1 अशा फरकान जिखल्या. एप्रीलांत कॅनडा आडची पांच मॅचींची माळ 4-0 फरकान जिखिल्ली. एक मॅच रद्द जाल्ली.
ह्या पंगडां मदीं अजून मेरेन सात टी-20 मॅची जाल्यात. हातूंतल्यो अमेरिकेन चार जाल्यार कॅनडान दोन मॅची जिखल्यात. सध्याचो फॉर्म पळयलो जाल्यार अमेरिकेचें दालें जड दिसता. पूण, कॅनडाक लेगीत उणो लेखपाक शकनात. 2022चे संवसारीक टी-20 सर्ती सावन 16 मॅची खेळ्ळा आनी हातूंतल्यो 10 मॅचींनी जैत जोडलां.
अमेरिके कडेन मुखेल मोनांक पटेल, स्टिवन टेलर आनी कोरी अॅण्डरसन हे बॅट्समन आसात. बॉलिंगेंत सौरभ नेत्रवळकरान अमेरिके वतीन सगल्यांत चड 27 विकेटी घेतल्यात. अश्टतासांचो खेळगडो हरमीत सिंग हाणें बांगलादेशा आड बरें प्रदर्शन केल्लें. अमेरिके खातीर ही बरी गजाल आसा.
कॅनडा खातीर अॅरन जॉन्सन आनी मुखेली साद बिन जफर म्हत्वाचे खेळगडे थारुये. जॉन्सन 2022चे संवसारीक टी-20 क्रिकेट सर्ती उपरांत कॅनडा वतीन सगल्यो 16 मॅची खेळ्ळा. ताणें 51चे सरासरीन आनी 166चे स्ट्रायक रेटीन दोन शेंकडे आनी पांच अर्द शेंकड्यां सयत 713 धांवड्यो केल्यात. साद बिन जफराची टी-20तली इकॉनोमी रेट फकत 6.39 आसा आनी ताणें 19चे उत्कृश्ट सरासरीन 37 मॅचींनी 43 विकेटी घेतल्यात.
मजगतीं, दोनूय पंगड पयले खेपे सप्टेंबर 1844त एकामेका आड खेळिल्ले. त्या वेळार कॅनडान अमेरिका पंगडाक 23 धांवड्यांनी हारयिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
